O‘zbekistonda oilaviy tadbirkorlikni rivojlantirish dasturlari doirasidagi muammoli kreditlar qoldig‘i joriy yil boshiga nisbatan 1-may holatiga ko‘ra 8 foizga kamaygan. Bu haqda Hisob palatasining matbuot xizmati xabar berdi.
Biroq dasturdagi muammoli kreditlar Namangan (44 foiz), Andijon (26 foiz) va Surxondaryo (20 foiz) viloyatlarida yuqoriligicha qolmoqda.
Hisob palatasi tomonidan ushbu hududlarda amalga oshirilgan o‘rganishlar natijasida muammoli kreditlarni undirish va ajratilgan kreditlardan samarali foydalanishda quyidagi kamchiliklarga yo‘l qo‘yilganligi aniqlangan:
– doimiy daromad manbaiga ega qarz oluvchilarning 149,4 mlrd so‘m, davlat tashkilotlari va banklarda faoliyat yuritayotgan xodimlarning 89,3 mlrd so‘m muammoli kreditlari undirilmagan;
– muammoli kreditlarning 79 foizida qaytmaslik xatari sug‘urtalangan bo‘lib, aksariyat hollarda banklar tomonidan ularni sug‘urta kompaniyalaridan undirish choralari ko‘rilmagan;
– joriy yil boshidan muammoli kreditlar ulushini kamaytirishda, banklar tomonidan ularni 69 foizini “umidsiz” deb tasniflab, balansdan chiqarish orqali qisqartirilgan.
– Chortoq tumani Baland adir hududida 2020-yilda tashkil etilgan mingta 2 sotixlik issiqxonalarning 95 foizi hozirda yaroqsiz holga kelib, ulardan foydalanilmaydi.
O‘rganish jarayonida muammoli kredit qarzdorliklari jami 101,2 mlrd so‘mga kamaytirildi.
Shuningdek, muammoli kreditlarni bartaraf etish, xususan kreditlar o‘z muddatida to‘lanmasligi va maqsadsiz ishlatilishi bo‘yicha choralar ko‘rildi.
Masalan, 400 mlrd so‘mlik muammoli kredit qarzdorligini undirish uchun sudlarga da’vo arizalari kiritildi. 55 mlrd so‘mlik muammoli kreditlar bo‘yicha to‘plangan hujjatlarga huquqiy baho berish uchun ular huquqni muhofaza qiluvchi organlarga berildi.
168 mlrd so‘mlik kredit qarzdorliklari bo‘yicha sud qarorlari Majburiy ijro byurolari tomonidan undiruvga qaratildi.
Avvalroq O‘zbekistonda oilaviy tadbirkorlikni qanday boshlash mumkinligi haqida xabar berilgandi.
Izoh (0)