24 июнь куни Ўзбекистон делегациясининг Туркий тилли давлатлар Парламент ассамблеяси (ТуркПА) XI ялпи ялпи мажлисидаги иштироки доирасида Олий Мажлис Сенати раиси Танзила Норбоева Туркий давлатлар ташкилоти (ТДТ) бош котиби Бағдод Амреев билан учрашди. Бу ҳақда парламент юқори палатаси матбуот хизмати хабар берди.
Учрашувда Туркий давлатлар ташкилотига аъзо мамлакатлар ўртасидаги муносабатларни турли соҳаларда, шу жумладан, ТуркПА доирасида янада ривожлантириш масалалари юзасидан фикр алмашилган.
Ўзбекистон 2019 йилда Ташкилотга қўшилганидан буён ТДТ фаолиятида фаол иштирок этаётганини таъкидлаб, Бағдод Амреев мамлакатда давлат ва жамият қурилиши, ишбилармонлик ва тадбиркорлик муҳитини яхшилаш соҳасида амалга оширилаётган кенг кўламли ўзгаришларни, республика томонидан Марказий Осиё мамлакатлари билан дўстлик ва яхши қўшничилик муносабатларини мустаҳкамлаш, шунингдек, Туркий давлатлар ташкилоти доирасида ҳамкорликни кучайтириш бўйича кўрилаётган чораларни юқори баҳолаган.
Учрашувда томонлар ТДТга аъзо давлатлар ўртасида савдо-иқтисодий ва инвестиция алоқаларини мустаҳкамлашда мазкур ташкилот ролини ошириш бўйича президент Шавкат Мирзиёевнинг ташаббусини амалга ошириш жараёнини, хусусан, Туркий тараққиёт банкини ташкил этиш масаласини ҳам муҳокама қилган.
Учрашув якунларига кўра, 2022 йилнинг кузида Тошкентда бўлиб ўтадиган ТДТ саммити доирасида расман таъсис этилиши режалаштирилаётган Туркий инвестиция фондини ишга туширишга тайёргарлик жараёнини тезроқ якунлаш бўйича келишувга эришилган.
Аввалроқ Танзила Норбоева бошчилигидаги Ўзбекистон парламенти делегацияси Чўлпон-ота шаҳрида (Қирғизистонда) бўлиб ўтган Туркий тилли мамлакатлар парламент ассамблеясининг (ТуркПА) XI ялпи мажлисида иштирок этгани тўғрисида хабар берилганди.
Эслатиб ўтамиз, 2021 йилнинг июнида Ўзбекистон ТуркПАга аъзо бўлиш тўғрисида қарор қабул қилганди.
Изоҳ (0)