Соғлиқни сақлаш вазирлиги томонидан Қашқадарё вилоятининг Ғузор туманига юборилган ишчи гуруҳ таркибида экани айтилган шифокорлар бу ёлғон эканини айтмоқда. Бу ҳақда «Дарё» мухбири билан суҳбатлашган шифокор Дилрабо Абдуллаева маълум қилди.
Суҳбатдошнинг маълумот беришича, Тошкентдан юборилган ишчи гуруҳ ҳудудга етиб боргунга қадар Ғузорда бўлиб туриш уларга юклатилган вазифа.«Мен бир ойдан бери Қашқадарёдаман. Болалар ўлимига сабаб бўлаётган омилларни ўрганиш учун ҳудудга аввалроқ юборилганмиз. Кеча соат 16:30 да Тошкентга қайтиб кетишим керак эди, ҳатто билетларим ҳам тайёр эди. Аммо эрта тонгдан телефон қилишиб, ‘барча ишингни ташла ва Ғузорга етиб бор’, дейишди. Топшириққа кўра, ёнимдаги шифокор билан Ғузорга бордик. Қўлимиздан келганича болаларга ёрдам қилдик. Кейин болаларни Қарши шаҳрига олиб боришлари кераклиги ҳақида айтдим ва Қаршига ўзим ҳам етиб бордим. Қаршида уларни тиббий кўрикдан ўтказдик. Болаларни олиб келган яқини бизга раҳмат айтиб, миннатдорлик изҳор қилди», — дейди Дилрабо Абдуллаева.
Дилрабо Абдуллаева «Дарё»да эълон қилинган мақолага эътироз билдириб, ишчи гуруҳ таркибида бўлмаса ҳам Ғузорга боргани ва болаларга кўмаклашишга ҳаракат қилганини айтиб, «бу мақола хизмат устига туҳмат бўлди», дейди.
Шифокор Тошкентдан юборилган ишчи гуруҳ кеча, 24 июнь куни соат 19:00 да Қашқадарёга етиб келганини айтди. Кейинчалик бу фикрини ўзгартириб, адашаётган бўлиши мумкинлигини, имкони бўлса унинг барча айтган гапларини эсдан чиқаришимиз кераклигини билдирди. Эълон қилинган мақолага ҳам ҳеч қандай эътирози йўқлигини айтди.
«Майли, айбдор керак бўлса, мен айбдорлигимча қолай. Сиз вазиятни яна суриштириб, вазирликни айбламанг. Ҳеч қандай эътирозим йўқ. Ҳаммаси ўз ҳолича қолсин», — дейди Дилрабо Абдуллаева.
Айни пайтда Қашқадарёда бўлиб турган шифокор унинг фикрлари ўзгаришига босим сабаб бўлган бўлиши мумкинлиги ҳақидаги тахминни рад этмоқда.
«Дарё» вазирликнинг Ғузорга етиб бориши керак бўлган махсус ишчи гуруҳи неччи кишидан иборатлиги ва ҳудудга қачон етиб боргани, шунингдек, Дилрабо Абдуллаева ҳамда Муборак Алихўжаевалар ишчи гуруҳ таркибида бор ёки йўқлигига аниқлик киритишга уринди. Бироқ вазирлик ахборот хизмати Фурқат Санаев барча саволларни очиқ қолдирди. Телефон қўнғироқларига ҳам жавоб бермади.
Вазирликнинг Қашқадарё вилоятидаги вакили, вилоят Соғлиқни сақлаш бошқармаси ахборот хизмати раҳбари Нуриддин Эгамов эса мазкур масала тўлиқлигича вазирлик назоратида эканини, ишчи гуруҳ вилоятга қачон келгани ва унинг таркибида неччи киши борлиги ҳақида маълумотлар унга маълум эмаслигини айтди.
«Мен шу икки нафар аёл вазирлик юборган ишчи гуруҳ таркибида бор деб юрибман. Махсус ишчи гуруҳ вакиллари бошқа бўлса, улардан хабарим йўқ», — дейди Нуриддин Эгамов.
«Дарё» воқеалар ривожини кузатишда давом этади.
Изоҳ (0)