Afg‘onistonda qutqaruv guruhlari 1,5 ming kishining hayotiga zomin bo‘lgan zilziladan omon qolganlarni qidirishda davom etmoqda, deb yozadi Reuters.
“Tolibon” vakillari qutqaruv operatsiyasi deyarli yakunlanganini, ammo aloqaning yomonligi va noteks yo‘llar shundoq ham gumanitar inqiroz bilan kurashayotgan mamlakatda qutqaruv ishlariga to‘sqinlik qilayotganini aytgan.
“Qutqaruv operatsiyasi yakunlandi, vayronalar ostida hech kim qolmagan”, — dedi “Tolibon”ning zilziladan eng ko‘p zarar ko‘rgan Paktika viloyatidagi oliy harbiy qo‘mondoni matbuot kotibi Muhammad Ismoil Muoviya.
Ayni paytda Favqulodda vaziyatlar vazirligi matbuot kotibi Muhammad Nassim Haqqoniy qutqaruv ishlari asosiy nuqtalarda yakunlanganini, biroq ayrim izolyatsiyadagi hududlarda davom etayotganini aytdi.
Afg‘onistonda 22-iyunga o‘tar kechasi yuz bergan 6,1 magnitudali zilzila oqibatida 1,5 ming kishi halok bo‘lgan, 2 ming kishi jarohatlangan, minglab inshootlar vayron bo‘lgan. “Tolibon” yetakchisi Haybatulla Oxundzoda qurbonlar soni ortishi mumkinligini aytdi.
Birlashgan Millatlar Tashkiloti Bosh kotibi Antoniu Guterrishning ta’kidlashicha, xalqaro tashkilot tibbiy guruhlar va jihozlarni yetkazishda yordam berish uchun to‘liq safarbar qilingan.
Yaponiya, Janubiy Koreya, Tayvan va Birlashgan Arab Amirliklari yordam jo‘natish niyatida ekanini bildirgan. Qo‘shni Pokistondan yordam yuklari allaqachon chegaradan o‘tgan. Yevropa Ittifoqi ham yordam taklif qilgan. O‘zbekiston Tashqi ishlar vazirligi fojia munosabati bilan afg‘on xalqiga hamdardlik bildirib, mamlakatga har tomonlama yordam ko‘rsatishga tayyorligini ma’lum qildi.
Oq uy bayonotida aytilishicha, AQSH prezidenti Jo Bayden voqealar rivojini kuzatmoqda hamda AQSH Xalqaro taraqqiyot agentligi (USAID) va boshqa federal hamkorlariga jabrlanganlarga yordam berish imkoniyatini baholashni topshirgan. AQSH hukumatiga ko‘ra, bu Afg‘onistonda so‘nggi yigirma yil ichida sodir bo‘lgan eng halokatli zilziladir.
Afg‘oniston Yevrosiyo va Hindistonning tektonik plitalari tutashgan joy yaqinida joylashgan Hindukush tog‘ tizmasida tez-tez yuz beradigan zilzilalardan aziyat chekadi.
Izoh (0)