O‘zbekistondan tarvuz eksportining bu yilgi mavsumi 15—20-may kunlari, ya’ni o‘tgan yilgi bilan deyarli bir vaqtda boshlandi.
Tarvuzning birinchi partiyalarini tashqi bozorlarga jo‘natish boshlanganidan buyon, ya’ni, eksport mavsumining birinchi oyida O‘zbekiston ushbu mahsulotni 28 ming tonnadan ziyod miqdorda eksport qildi. Bu kamida so‘nggi besh yildagi rekord ko‘rsatkichdir, deydi EastFruit tahlilchilari.
O‘zbekiston Bojxona qo‘mitasining dastlabki ma’lumotlariga ko‘ra, 2022-yilning 16-mayidan 15-iyuniga qadar O‘zbekistondan 28,1 ming tonna tarvuz eksport qilingan.
Bu 2021-yilning shu davriga nisbatan 3,4 barobar ko‘pdir. Agar 2018—2020-yillarning xuddi shu davrida O‘zbekistondan tarvuz eksporti 1,6 ming tonnadan oshmaganini hisobga olsak, joriy mavsumning birinchi oyida eksport hajmi 2018—2020-yillardagi ko‘rsatkichlardan kamida 17 barobar oshib ketdi.
Eksport geografiyasi haqida so‘z yuritadigan bo‘lsak, deyarli butun hajm — eksportning qariyb 99,5 foizi Yevrosiyo iqtisodiy ittifoqi (YOII) mamlakatlari bozorlariga va 70 tonnagacha bo‘lgan kichik partiyalar quyidagi mamlakatlarga jo‘natildi: Mo‘g‘uliston — 60 tonna, Ukraina — 20 tonna va Latviya — 18 tonna.
O‘zbekistonda joriy mavsum tarvuz narxining nisbatan arzonligi ham boshqa omillar qatori eksport hajmi rekord darajada bo‘lishiga sababdir.
EastFruitning narxlar monitoringi ma’lumotlariga ko‘ra, so‘nggi hafta — o‘n kun ichida ushbu mahsulotning o‘rtacha ulgurji narxlari 2000 so‘m/kg darajasida bo‘lib turibdi.
Bu o‘tgan yilning shu davridagi narx darajasiga mos keladi va 2020-yilning ayni davridagidan taxminan 40 foiz pastdir.
Avvalroq O‘zbekistonda sariq rangli tarvuz yetishtirilayotgani haqida xabar berilgan edi.
Izoh (0)