Келаси 5 йил ичида Ўзбекистондаги 70 минг километрлик электр линиялари ҳамда 20 мингта трансформатор янгиланади. Бу ҳақда бугун, 23 июнь куни бўлиб ўтаётган энергетика форумида «Ҳудудий электр тармоқлари» АЖ раисининг биринчи ўринбосари Жаҳонгир Обиджонов маълум қилди, дея хабар бермоқда «Дарё» мухбири.
Жаҳонгир Обиджоновнинг айтишича, ҳозирда линиялар ва трансформаторларни янгилаш ишлари бошланган.
«Электр линияларининг асосий қисми 60–70 йилларда қурилган. Уларни янгилаш ишлари олиб бориляпти. Масалан, 2021 йилда 15 минг километр электр линиялари билан 4 мингта трансформатор пунктлари янгиланди. Бу йил ҳам линияларни модернизация ва реконструктура қилиш ишлари давом этмоқда. Ҳозирда олдимизда 5 йиллик режа турибди. Унга кўра, Ўзбекистонда 70 минг километр электр линиялари янгитдан қурилиб, реконструктура қилинади. Шу билан бирга, 20 мингта янги трансформатор ўрнатилади. Масалан, бугунги кунда ‘Обод маҳалла’ ва ‘Обод қишлоқ’ дастурлари доирасида линияларни янгилаш ишлари бошланган. Янгиланган тармоқлар бирични навбатда аҳолига электр энергиясини сифатли ва барқарор етказиб беришни таъминлайди. Тизимдаги авариялар камаяди, электр энергиясидаги узилишлар бартараф этилади», — деди корхона масъули.
Жаҳонгир Обиджонов Тошкент шаҳрида бўлиб ўтаётган энергетика форумининг аҳамияти ҳақида ҳам фикр билдирди.
«Бу форум фикр алмашиш майдони ҳисобланади. Жараёнда республикага янги технологияларни олиб келиш бўйича тажриба алмашилади. Тадбирга меҳмон сифатида қўшни давлатлар вазирлари, халқаро молия институтлари консултантлари чақирилган. Бу ерда бугунги дунё тажрибасидан келиб чиқиб, энергетика соҳасини ривожлантириш учун нима ишлар қилиш кераклиги муҳокама қилинади. Биз учун муҳими, биринчи навбатда тизимни рақамлаштириш ва қайта тикланувчи энергетикани ривожлантиришдир. Шу масалада ҳам, албатта, муҳокамалар бўлади» — деди корхона расмийси.
Маълумот учун, «Ҳудудий электр тармоқлари» тизимида 260 минг километр электр линиялари, 86 мингта трансформатор, 1 минг 700 та подстанция мавжуд.
Изоҳ (0)