Тожикистон шимолидаги Сўғд вилоятининг Қирғизистон билан чегарадош бўлган Исфара шаҳри ва унинг таркибига кирувчи Чоркўҳ қишлоғидаги тўққизта кўча чегарадаги тўқнашувларда ҳалок бўлганларнинг исми билан номланди, деб ёзади Asia-Plus Исфара маъмурияти ижтимоий ривожланиш ва жамоатчилик билан алоқалар бўлими мудираси Шаҳира Йўлдошевага таяниб.
Унинг сўзларига кўра, географик ва жисмоний объектларни чегарадаги низолар қурбонлари ва меҳнат фахрийлари шарафига номлаш ҳақидаги қарор 13 июнь куни Исфара Халқ депутатлари мажлисининг ўн иккинчи сессиясида қабул қилинган.
Қарорда таъкидланишича, бу одамлар «жамоатчилик ва Ватан манфаатларини ўз манфаатларидан устун қўйиб, мамлакат чегараларини, ўз уйларини ва қишлоғини ҳимоя қилиш учун жонларини фидо қилган».
Ушбу қарор асосида, кўчаларга, хусусан, ўз хизмат вазифаларини бажариш чоғида чегарадаги зиддиятда ҳалок бўлган Исфара марказий касалхонаси тез ёрдам ҳайдовчиси, 2021 йил апрели охирида Қирғизистон билан чегарадаги қонли қирғинда қурбон бўлган Чоркўҳ қишлоғининг саккиз нафар фуқароси номлари қўйилди.
Шунингдек, маҳаллий фаоллар ҳукуматга мурожаат қилиб, Воруҳ қишлоғидаги кўчалардан бирига марҳум журналист ва Исфара собиқ ҳокими Иқбол Тешаев номини беришни сўраган.
Қирғизистон ва Тожикистон чегараси вақти-вақти билан икки мамлакат маҳаллий аҳолиси ва чегарачилари ўртасидаги низолар ҳудудига айланиб туради. Бунга сабаб делимитация қилинмаган ерлар бўлиб, у ерларда давлатлар ўртасидаги чегара қаердан ўтишини аниқлаб бўлмайди.
Чунончи, 14 июнь куни эрталаб Қирғизистон ва Тожикистон чегарасида отишма юз берди, Тожикистон томони гранатомёт ва миномётларни қўллади. Чегаранинг қирғиз-тожик қисмидаги вазият кескин деб тавсифланди. Кейинроқ отишма оқибатида тожикистонлик муддатли ҳарбий хизматчи ҳалок бўлгани хабар берилди.
2021 йилнинг 28—29 апрель кунлари қирғиз-тожик чегарасида содир бўлган йирик қуролли тўқнашувда ҳар икки томондан жами 55 киши ҳалок бўлган, 300 га яқин одам жароҳатланган эди. Музокаралар натижасида можарога барҳам берилди, шундан сўнг Тожикистон ва Қирғизистон умумий чегарани делимитация қилиш бўйича ишларни фаоллаштирди. Ўтган йил давомида икки давлат топографик ишчи гуруҳларининг бир неча учрашувлари бўлиб ўтди, охиргиси апрель ойи бошида ўтказилди.
Изоҳ (0)