Европа Иттифоқининг навбатдаги санкциялари пакетига Россия олтини ҳам киритилиши мумкин. Бу ҳақда Reuters 23—24 июнь кунлари бўлиб ўтадиган ЕИ саммити учун тайёрланган таклифлар лойиҳасига таяниб хабар бермоқда.
«Расмий вакилларнинг сўзларига кўра, ҳозир янги пакет тайёрланмаётган бўлса-да, унинг таъсирига тушиши мумкин бўлган тармоқларни аниқлаш бўйича ишлар давом этмоқда, бунда олтин эҳтимолий нишонлардан биридир», — дея тушунтиради агентлик. Reuters маълумотларига кўра, санкциялар олтинга таъсир қилиши мумкинлигини тахмин қилаётган давлатлардан бири Даниядир.
«Санкция ишлари билан таниш манбанинг Reuters агентлигига маълум қилишича, Еврокомиссия санкцияларнинг навбатдаги раундига Россия олтинини қўшиш устида ишламоқда», — таъкидлади агентлик.
Reuters хабарига кўра, янги ҳужжатда санкцияларнинг еттинчи пакети ҳақида тўғридан-тўғри сўз юритилмайди, у иттифоқ аъзоларининг турли позициялари ўртасидаги муроса ҳисобланади. Скандинавия ва Шарқий Европа давлатлари зудлик билан янги санкциялар жорий этишни, Германия ва Нидерландия эса мавжуд чораларни қўллашга эътибор қаратишни таклиф қилган.
Олтин Россия Марказий банкининг асосий активларидан биридир. Уруш бошланганидан сўнг Марказий банкнинг 300 миллиард долларга яқин олтин-валюта активлари Ғарб санкцияларига мувофиқ музлатиб қўйилди. АҚШ ғазначилиги Марказий банкка алоқадор олтин билан боғлиқ ҳар қандай операциялар санкциялар остида эканини маълум қилди. Марказий банк захираларининг қарийб ярми олтин кўринишида сақланади.
Россиядаги иккинчи йирик олтин қазиб олувчи «Полиметалл» компанияси вакилларининг таъкидлашича, компания Ғарб санкциялари остида қолмаган бўлса-да, транспорт компаниялари ускуналарни ташишдан бош тортгани унинг фаолиятига таъсир қилган.
Изоҳ (0)