Taniqli tojik blogeri va qo‘shiqchisi Abduroziq Dubay xalqaro aeroportida politsiya tomonidan hibsga olindi. Mahalliy OAV xabar berishicha, 21 yoshli ijtimoiy tarmoqlar yulduzi o‘g‘rilikda gumon qilinmoqda.
Ma’lumotlarga ko‘ra, u erta tongda Chernogoriyadan Dubayga uchib kelgan va darhol aeroport hududida qo‘lga olingan. Hozirda uning ishi bo‘yicha tergov harakatlari olib borilmoqda. Rasmiy organlar holat yuzasidan hozircha batafsil izoh berganicha yo‘q.
Bo‘yi taxminan bir metr bo‘lgan Abduroziq Markaziy Osiyo va Yaqin Sharqda eng mashhur bloger va xonandalardan biri hisoblanadi. U o‘zining satirik va kulgili videolari, ashulalari hamda turli realiti-shoular, jumladan, Hindistonning mashhur Bigg Boss 16 loyihasidagi ishtiroki orqali keng auditoriyaga tanilgan.
So‘nggi uch yil ichida Abduroziq Birlashgan Arab Amirliklarining “oltin” vizasiga ega bo‘lib, doimiy ravishda Dubayda istiqomat qilib kelayotgan edi. U 2024-yilda Coca Cola Arena sahnasida ilk bor boks ringiga chiqib, sport sohasida ham o‘zini sinab ko‘rdi. So‘ng Buyuk Britaniyada Habibi nomli o‘zining restoran brendini yo‘lga qo‘ydi.
O‘tgan yili ham Abduroziq Hindiston huquq-tartibot organlari tomonidan so‘roq qilingan edi. U mehmonxona biznesiga oid, pul yuvish bilan bog‘liq tergov doirasida ko‘rsatma bergan. Biroq o‘shanda u ayblanuvchi emas, guvoh sifatida ishtirok etgan. Ijtimoiy tarmoqlarda faol bo‘lgan bloger hozirda 8 milliondan ortiq kuzatuvchiga ega.
Izoh (0)