Germaniyada ilk bor sanksiyalar tufayli rossiyaliklarning ko‘chmas mulki musodara qilindi

Gap Rossiya Kommunistik partiyasi deputati va uning rafiqasining uchta kvartirasi haqida ketmoqda. Germaniyada ham ularga nisbatan sanksiyalarni buzganlik aybi qo‘yildi: Myunxen prokuraturasiga ko‘ra, ular nafaqat ko‘chmas mulkka egalik qilgan, balki uni ijaraga berishdan ham pul olgan.

“Myunxen prokuraturasi sanksiyalar tufayli rossiyaliklarning uchta kvartirasini musodara qildi va bank hisoblarini hibsga oldi” — dedi katta prokuror Anna Lyayding. “Bu Germaniyada nafaqat hisobraqamlardagi mablag‘, balki ko‘chmas mulk ham muzlatilgan birinchi holat”, deya qo‘shimcha qilgan prokuror.

Ushbu mulk 23-fevral kuni Rossiyaning DXR va LXRni tan olishi sababli Yevropa Ittifoqi sanksiyalari ostida qolgan Davlat Dumasi deputati va uning rafiqasiga tegishli.

Prokuratura ma’lumotlariga ko‘ra, uchta kvartiraning barchasi Myunxenda joylashgan bo‘lib, hisob raqamga tushadigan ijara to‘lovlari oyiga taxminan 3500 yevroni tashkil qiladi.

Deputat va uning rafiqasi sanksiyalarni buzganlikda ayblanadi. Agar ular Germaniyaga kelib, bu yerda sud qilinsa, besh yilgacha qamoq jazosiga hukm qilinishi mumkin.