Samarqand viloyati, Urgut tumanidagi “Gulobod” va “Qayroqli” mahallalarida yillar davomida hal etilmay kelayotgan yo‘l muammosi mavjud. Mazkur mahallalarda yashovchi aholidan mahallani tuman markazi hamda shahar bilan bog‘lovchi ichki yo‘llarning ta’mirtalabligi, yilning qish va bahor oylarida transport qatnovida muammolar bo‘layotganligi haqida mutasaddi tashkilotlarga ko‘plab murojaatlar tushgan. Eng achinarlisi, fuqarolar tomonidan tuman hokimligiga bir necha bor murojaat qilingan bo‘lsa-da, muammo shu vaqtgacha hal etilmayapti.
“Daryo” muxbiri Farhod Norbo‘tayev aholi bilan uchrashib, ularni qiynayotgan yo‘l muammosi haqidagi fikrlarini eshitdi.
“Bu ko‘chalardan yurib bo‘lmaydi, ahvolini ko‘ryapsizlar. Ikki-uch yildan buyon ahvol shu. Murojaat qilyapmiz. Ammo natija yo‘q. Tuman markazidan bor-yo‘g‘i 3 kilometr uzoqlikdagi yo‘ldan yomg‘ir kunlari yurib bo‘lmaydi”, — deydi Sami Muhammadiyorov.
Shu mahallada yashovchi Muhiddin Qobilovning aytishicha, tuman markazidan kirib keluvchi Islom Karimov ko‘chasi ham kavlab tashlangan. Yo‘lni yamash uchun kavlab tashlangan chuqurlar to‘ldirilmagan. 2019-yildan beri yo‘llarda hech qanday o‘zgarish yo‘q.
Yillar davomida murojaati hal bo‘lmayotgan fuqarolarning hokimiyatga bo‘lgan ishonchi yo‘qolgan. Mahalla ahli hashar qilib yo‘lga tosh to‘kkan. Aholining aytishicha, ularning qilayotgan ishlarini kimdir rasmga olib, qayergadir maqtangan.
“Yo‘llarimiz tuxum korobkasiga o‘xshab qolgan. Hokim vakillari har doim kelib, qop-qop va’dani berib ketishadi, ammo natija yo‘q. Urgut tuman hokimi kelib, bizga 15 kun ichida asfalt qilishga harakat qilamiz, deb aytib ketgan edi. U va’dani berganiga ham ikki oy bo‘lyapti. Ikki yil oldin o‘zimiz tashabbus ko‘rsatib, hashar yo‘li bilan 150 mashina tosh to‘kkan edik. Kelib bizlarning ishimizni rasmga olib ketishdi. Qayergadir uni ko‘rsatib, maqtangan bo‘lishi mumkin, bizlar buni bilmaymiz. Lekin natija yo‘q. Keladi, xalqni aldab va’dani beradi. Yana ahvol shu. Prezidentimiz ham ‘Obod mahalla’ haqida gapiryapti. Hamma joyda o‘zgarish bo‘lyapti. Bizda hech natija bo‘lmayapti”, — deydi Sherzod Halilov.
Fuqarolarning aytishicha, yo‘llarni ta’mirlash 2022-yilgi dasturga kiritilgan. Xo‘sh, yilning yarmi ham o‘tib borayotgan bo‘lsa, bu yo‘llar qachon ta’mirlanadi?
“Menga 2022-yilda dasturga qo‘yilgan, degan gapni aytdi. Ammo men tumandagilarga ishonmasdan, viloyatga chiqqan edim, ular haqiqatan dasturga kirganligini isbotlovchi hujjatni berishdi. Kelib, maktab yo‘li va ichki yo‘lni o‘lchab, dasturga kirgan, deb ketishdi. Davlat dasturi bo‘lganidan keyin pulni ajratish kerak. Loyiha bilan qilish kerak. Xalqning e’tirozi — yo‘lni qilib bermaganligida”, — deydi Sharofboy Ahmedov.
“Bu masala bo‘yicha tuman hokimiga murojaat qildik. Lekin hech qanday o‘zgarish yo‘q. 2022-yilning 7-aprel kuni sayyor qabulga kirib, tuman hokimi Botir Jabborov bilan suhbatlashdim. Tuman hokimi bizning yo‘limiz hali loyihada yo‘q, dedi. Men bundan xafa bo‘ldim. Hokim ko‘chaga tosh to‘kib berishni va’da qildi, lekin asfalt qilib berolmayman, dedi. Ammo hali ham javob yo‘q. Bizda ikkita maktab bor: boshlang‘ich sinf va kattalar. Murg‘ak bolalar maktabga borguncha ustlari shalabbo bo‘lib borishadi”, — deydi Dilorom Jolmatova.
Biz bilan suhbatda bo‘lgan Urgut tuman hokimining qurilish masalalari bo‘yicha o‘rinbosari Shohrux Aliqulovning ta’kidlashicha, “Gulobod” va “Qayroqli” mahallalaridan o‘tuvchi 2 kilometr yo‘l yil oxirigacha joriy ta’mirlanadi.
“‘Gulobod’ va ‘Qayroqli’ mahallalari hududidan o‘tgan yo‘lning 2 kilometr qismi tuman yo‘llardan foydalanish unitar korxonasi tomonidan to‘liq yil yakuniga qadar joriy ta’mirlanib, foydalanishga topshiriladi. Islom Karimov ko‘chasi joriy ta’mirga tushib, avtoyo‘l tomonidan ta’mirlanmoqda. Bugungi kunda birinchi chorak yakuni va ikkinchi chorakning ikki oyida 22 ta og‘ir mahalla hududlarining qariyb 160 kilometrga yaqin loy ko‘chalari tosh ko‘chaga aylantirildi. Tumanimizda 2021-yilda qariyb 110 kilometrga yaqin yo‘llar asfalt qilinib, 180 kilometrdan ortiq loy ko‘chalarga toshlar tashlangan”, — deydi tuman hokimining qurilish masalalari bo‘yicha o‘rinbosari Shohrux Aliqulov.
Tuman ahli “Yo‘llarimiz qachon yo‘lga o‘xshaydi, bizda ham qachon obodonchilig-u o‘zgarishlar bo‘ladi?” deyishmoqda. Tuman hokimi o‘rinbosari Shohrux Aliqulovning ta’kidlashicha, Urgut tumani “O‘ramas” mahallasida tuman avtomobil yo‘llariga qarashli yangi asfalt ishlab chiqaruvchi zavod qurilgan. Uning to‘liq ishga tushirilishi tez orada yo‘l muammosini bartaraf etadi.
Yillar mobaynida aholi murojaati nega e’tiborsiz qolib kelmoqda? Nahotki bu yo‘llar shu vaqt davomida biror marotaba ham davlat dasturiga kiritilmagan bo‘lsa?! Agar kiritilgan bo‘lsa, unda nega hech qanday ish qilinmagan?! Qachondir bunga kimdir javob beradimi yoki yopig‘liq qozon yopig‘liq holida qolib ketaveradimi?
Izoh (0)