Milliy gvardiya 19-iyun kuni “Bunyodkor” stadionida 23 yoshgacha bo‘lgan o‘smirlar o‘rtasidagi Osiyo kubogi-2022 musobaqasining final o‘yini bo‘lib o‘tishi munosabati bilan futbol muxlislariga murojaat bilan chiqdi.
Qayd etilishicha, Milliy gvardiya stadionga keladigan muxlislarga o‘zini tutish madaniyatini yodda tutishni, hakamlarga, futbolchilarga, jumladan, raqib jamoaga, stadion texnik xodimlariga hurmat ko‘rsatish zarurligini, tozalik va jamoat tartibini saqlashni eslatib o‘tgan.
“Stadionga taqiqlangan narsalarni: qurol-yarog‘, tez yonuvchi moddalar va buyumlar, dori vositalari (retsept yoki uning nusxasi ko‘rsatilganda shifokor ko‘rsatmasi bo‘yicha belgilangan miqdorda dori vositalaridan tashqari), oziq-ovqat va idishlarni; texnik jihozlar (mobil telefonlardan tashqari), himoya vositalari, xizmat asboblari va sport anjomlarini olib kelmang”, — keltiriladi xabarda.
Bundan tashqari, ishqibozlardan shubhali narsalar, shuningdek, jamoat tartibini buzish holatlari aniqlangan taqdirda, ichki ishlar organlari xodimlariga yoki Milliy gvardiya harbiy xizmatchilariga xabar berish so‘ralgan.
“Hurmatli muxlislar! Sizlarni madaniyatga chaqiramiz: o‘yinning borishidan, urilgan gollar yoki o‘tkazib yuborilgan gollar sonidan qat’i nazar, odobsiz so‘zlarni ishlatmang va bundan tashqari tartibsizliklarga olib keladigan chaqiriqlar, o‘yinning boshqa ishtirokchilariga nisbatan hurmatsizlik qilmang.
Jamoat tartibini buzish, tosh va boshqa narsalarni otish, haddan tashqari his-tuyg‘ularni ushlab turolmaslik va bundan tashqari, hujum bilan nizo qo‘zg‘atish sportchilar uchun yordam emasligini yodda tuting. Qolaversa, muxlislarning xulq-atvori sportchilarimizga va umuman davlatga bo‘lgan munosabatga bevosita ta’sir qiladi”, — deyiladi xabarda.
Shuningdek, Milliy gvardiya axborot xizmati bezorilik, jamoat joylarida uyatli so‘zlar bilan so‘kinish, Ichki ishlar organlari xodimlarining qonuniy talablariga bo‘ysunmaslik tegishli tartibda javobgarlikka tortilishi haqida eslatib o‘tgan.
Eslatib o‘tamiz, O‘zbekiston va Saudiya Arabistoni o‘rtasidagi U-23 Osiyo Kubogi finali “Bunyodkor” stadionida, 19-iyun kuni soat 18:00 da boshlanadi. Final uchrashuviga kirish 14:00 dan boshlanadi. Shu munosabat bilan stadioniga tutash ko‘chalar vaqtinchalik yopiladi.
Chiptalar sotuvidagi ajiotaj haqida
17-iyun kuni “Daryo” muxbiri final o‘yiniga chipta xarid qilish uchun minglab muxlislar “Bunyodkor” stadioni atrofida to‘plangani haqida xabar bergandi. Chiptaxona oldida uzun navbatlar yuzaga kelgandi. Chiptaxona juda katta tanaffuslar bilan oz miqdordagi chiptalarni sotgan. Muxlislar yopiq chiptaxonaga navbatda turgan vaqtda chayqovchilar hech qanday taqiqsiz oldi-sotdi bilan shug‘ullandi. Kassada 25 ming so‘m bo‘lgan chiptalar “qo‘lda” 100—150 mingdan sotildi. Markaziy sektorlar uchun belgilangan chiptalar esa 400—500 ming so‘mdan sotildi.
Shu kuni 19:00 larga yaqin chiptaxona yopilgani ma’lum qilindi va tartibsizlik kuchayib ketdi. Shundan so‘ng Milliy gvardiya xodimlari chiptaxona atrofini muxlislardan “tozaladi”. Milliy gvardiya xodimlari buning uchun ko‘zdan yosh oqizuvchi gazdan foydalangani aytilgandi. Biroq Milliy gvardiya bunday ma’lumotlarni inkor etdi va “stadioni kassalari oldida tartibni saqlash uchun hech qanday kuch ishlatish yoki maxsus vositalardan foydalanilmaganini” ma’lum qildi.
O‘FA media departamenti rahbari Davron Fayziyev holatga munosabat bildirib, iTicket.uz onlayn platformasi tomonidan va “Bunyodkor” stadioni kassalarida chiptalar sotuvi boshlangani, biroq stadion atrofida chayqovchilar tufayli tartibsizliklar yuzaga kelganini bildirgan.
Izoh (0)