Миллий гвардия 19 июнь куни «Бунёдкор» стадионида 23 ёшгача бўлган ўсмирлар ўртасидаги Осиё кубоги-2022 мусобақасининг финал ўйини бўлиб ўтиши муносабати билан футбол мухлисларига мурожаат билан чиқди.
Қайд этилишича, Миллий гвардия стадионга келадиган мухлисларга ўзини тутиш маданиятини ёдда тутишни, ҳакамларга, футболчиларга, жумладан, рақиб жамоага, стадион техник ходимларига ҳурмат кўрсатиш зарурлигини, тозалик ва жамоат тартибини сақлашни эслатиб ўтган.
«Стадионга тақиқланган нарсаларни: қурол-яроғ, тез ёнувчи моддалар ва буюмлар, дори воситалари (рецепт ёки унинг нусхаси кўрсатилганда шифокор кўрсатмаси бўйича белгиланган миқдорда дори воситаларидан ташқари), озиқ-овқат ва идишларни; техник жиҳозлар (мобил телефонлардан ташқари), ҳимоя воситалари, хизмат асбоблари ва спорт анжомларини олиб келманг», — келтирилади хабарда.
Бундан ташқари, ишқибозлардан шубҳали нарсалар, шунингдек, жамоат тартибини бузиш ҳолатлари аниқланган тақдирда, ички ишлар органлари ходимларига ёки Миллий гвардия ҳарбий хизматчиларига хабар бериш сўралган.
«Ҳурматли мухлислар! Сизларни маданиятга чақирамиз: ўйиннинг боришидан, урилган голлар ёки ўтказиб юборилган голлар сонидан қатъи назар, одобсиз сўзларни ишлатманг ва бундан ташқари тартибсизликларга олиб келадиган чақириқлар, ўйиннинг бошқа иштирокчиларига нисбатан ҳурматсизлик қилманг.
Жамоат тартибини бузиш, тош ва бошқа нарсаларни отиш, ҳаддан ташқари ҳис-туйғуларни ушлаб туролмаслик ва бундан ташқари, ҳужум билан низо қўзғатиш спортчилар учун ёрдам эмаслигини ёдда тутинг. Қолаверса, мухлисларнинг хулқ-атвори спортчиларимизга ва умуман давлатга бўлган муносабатга бевосита таъсир қилади», — дейилади хабарда.
Шунингдек, Миллий гвардия ахборот хизмати безорилик, жамоат жойларида уятли сўзлар билан сўкиниш, Ички ишлар органлари ходимларининг қонуний талабларига бўйсунмаслик тегишли тартибда жавобгарликка тортилиши ҳақида эслатиб ўтган.
Эслатиб ўтамиз, Ўзбекистон ва Саудия Арабистони ўртасидаги U-23 Осиё Кубоги финали «Бунёдкор» стадионида, 19 июнь куни соат 18:00 да бошланади. Финал учрашувига кириш 14:00 дан бошланади. Шу муносабат билан стадионига туташ кўчалар вақтинчалик ёпилади.
Чипталар сотувидаги ажиотаж ҳақида
17 июнь куни «Дарё» мухбири финал ўйинига чипта харид қилиш учун минглаб мухлислар «Бунёдкор» стадиони атрофида тўплангани ҳақида хабар берганди. Чиптахона олдида узун навбатлар юзага келганди. Чиптахона жуда катта танаффуслар билан оз миқдордаги чипталарни сотган. Мухлислар ёпиқ чиптахонага навбатда турган вақтда чайқовчилар ҳеч қандай тақиқсиз олди-сотди билан шуғулланди. Кассада 25 минг сўм бўлган чипталар «қўлда» 100—150 мингдан сотилди. Марказий секторлар учун белгиланган чипталар эса 400—500 минг сўмдан сотилди.
Шу куни 19:00 ларга яқин чиптахона ёпилгани маълум қилинди ва тартибсизлик кучайиб кетди. Шундан сўнг Миллий гвардия ходимлари чиптахона атрофини мухлислардан «тозалади». Миллий гвардия ходимлари бунинг учун кўздан ёш оқизувчи газдан фойдалангани айтилганди. Бироқ Миллий гвардия бундай маълумотларни инкор этди ва «стадиони кассалари олдида тартибни сақлаш учун ҳеч қандай куч ишлатиш ёки махсус воситалардан фойдаланилмаганини» маълум қилди.
ЎФА медиа департаменти раҳбари Даврон Файзиев ҳолатга муносабат билдириб, iTicket.uz онлайн платформаси томонидан ва «Бунёдкор» стадиони кассаларида чипталар сотуви бошлангани, бироқ стадион атрофида чайқовчилар туфайли тартибсизликлар юзага келганини билдирган.
Изоҳ (0)