Шольц Евроиттифоқ таркибига кириш қоидаларини соддалаштиришни таклиф қилди

Германия канцлери Олаф Шольц янги мамлакатларнинг Европа Иттифоқига кириш жараёнини соддалаштиришни таклиф қилди. Бу ҳақда у DPA нашри билан суҳбатда айтган.

Бунинг учун Брюссель «ўз структуралари ва қарор қабул қилиш жараёнларини модернизация қилиши зарур», — деди у.

Шольц 23—24 июнь кунлари бўлиб ўтадиган ЕИ саммитида бу масалани кўтариш ниятида. Ўша йиғилишда Европа Иттифоқи етакчилари Украина, Молдова ва Грузияга аъзоликка номзод мақомини бериш масаласини кўриб чиқади.

Ҳозир Европа Иттифоқига аъзо бўлиш учун ариза топширган давлатлар ушбу мақомни фақат барча аъзо давлатларнинг бир овоздан қабул қилган қарори билан олиши мумкин. Бироқ канцлер якдиллик тамойилини шубҳа остига қўймоқда.

Шольц Брюсселни Украинанинг мақоми борасида «бирлик руҳида» қарор қабул қилишга чақирди. Унинг қайд этишича, жараён мураккаб бўлади: Европа Иттифоқига аъзо бўлишни хоҳловчи ҳар бир номзод давлат «кўплаб талабларни» бажариши керак.

Канцлер, шунингдек, саммит ЕИга киришни кутаётган Болқон давлатларига туртки беришига умид қилмоқда. «Биз Ғарбий Болқон мамлакатларига жиддий кайфиятда эканимизни кўрсатишимиз керак. Албания ва Шимолий Македония Европа Иттифоқига аъзо бўлиш бўйича аниқ музокараларни бошлаш учун барча талабларга жавоб беради», — деди у ва бу музокаралар «ҳозироқ бошланиши кераклигини» қўшимча қилди.

17 июнь куни Европа Комиссияси Украина ва Молдовага ЕИга номзод мақомини беришни тавсия қилди. Грузия ҳозирча рад этилган — Европа комиссияси президенти Урсула фон дер Ляеннинг сўзларига кўра, мамлакат «ҳозир ЕИ йўналишидаги таркибий ислоҳотлар бўйича умумий йўналишни аниқлаш учун сиёсий жиҳатдан бирлашиши керак».

Украина ва Молдова ҳам ислоҳотлар ўтказиши зарур. Шу билан бирга, Еврокомиссия «украиналиклар Европа истиқболи учун жон беришга тайёр», дея тан олди. Киев бажариши керак бўлган шартлар қаторида юқори даражадаги коррупция ва олигархларга қарши курашни кучайтириш, шунингдек, озчиликларга оид қонунчиликни ислоҳ қилиш ҳам бор.

Ҳозирда ЕИга номзодлар —Туркия (1999), Шимолий Македония (2005), Сербия (2012), Черногория (2012) ва Албания (2014) ҳисобланади. Украина президенти Владимир Зеленский Украина, Албания, Черногория ва Шимолий Македония ўзаро рақиб эмаслигини ва улар Европа Иттифоқининг тўлиқ аъзоси бўлиши кераклигини айтганди.