Ijtimoiy tarmoqlarda to‘y kuni o‘yinda yutqazib qo‘ygan kuyov kelinni urgani aks etgan videolavha tarqalgandi. Keyinroq mazkur to‘y marosimi Surxondaryoda bo‘lgani aniqlangandi. “Mening yurtim” telekanali tomonidan tayyorlangan lavhada ma’lum qilinishicha, kelinning da’vosi yo‘qligi sabab kuyov jarimaga tortilmaydigan bo‘lgan.
“O‘zimni tutib tura olmaganim sabab qo‘lim ketib qoldi. Tushunmovchilik hal bo‘lganidan keyin qaytib chiqib, davom ettirdik, kelindan uzr so‘radim”, — deydi 25 yoshli kuyov.
Ma’lum qilinishicha, o‘sha vaqtda kelin-kuyov o‘rtasida syurpriz o‘yini o‘tkazilgan va kuyov shirinlikni o‘zidan birinchi ochgan kelinning boshiga urgan.
Ijtimoiy tarmoqlarda ular qonuniy nikohdan o‘tmagan degan fikrlar ham tarqalgan. Aniqlanishicha, ular 22-may kuni FHDYga ariza bergan. Bundan tashqari, to‘y kuni kelinning onasi qizini sahnadan tushirib, uyiga olib ketdi degan taxminlar ham o‘z tasdig‘ini topmagan.
“Uzr so‘rashganidan keyin, to‘y davom etdi. Telefonda gaplashib turibmiz, yaxshi yashayapmiz deyapti”, — deydi ona.
Mazkur holat jinoyat ishlari bo‘yicha Uzun tumani sudi tomonidan o‘rganib chiqilgan, kelinning da’vo e’tirozi bo‘lmagani uchun yigitga ma’muriy jarima qo‘llanmaydigan bo‘lgan.
Bundan oldinroq Milliy mass-mediani qo‘llab quvvatlash va rivojlantirish jamoat fondi Vasiylik kengashi raisi o‘rinbosari, O‘zbekistonda gender tengligini ta’minlash komissiyasi a’zosi Saida Mirziyoyeva holatga munosabat bildirib, “bunday holatlarni xotirjam kuzatish mumkin emas”ligini ta’kidlagandi. Oliy Majlis Senati Xotin qizlar va gender tenglik masalalari qo‘mitasi esa bu kabi salbiy holatlarning oldini olish maqsadida Senatda xotin-qizlar va bolalarning huquqlari, erkinliklari hamda qonuniy manfaatlarini ishonchli himoya qilishga qaratilgan qonunchilikni takomillashtirish masalalari yuzasidan ishchi guruh tuzilganini ma’lum qilgan.
Izoh (0)