Ижтимоий тармоқларда тўй куни ўйинда ютқазиб қўйган куёв келинни ургани акс этган видеолавҳа тарқалганди. Кейинроқ мазкур тўй маросими Сурхондарёда бўлгани аниқланганди. «Менинг юртим» телеканали томонидан тайёрланган лавҳада маълум қилинишича, келиннинг даъвоси йўқлиги сабаб куёв жаримага тортилмайдиган бўлган.
«Ўзимни тутиб тура олмаганим сабаб қўлим кетиб қолди. Тушунмовчилик ҳал бўлганидан кейин қайтиб чиқиб, давом эттирдик, келиндан узр сўрадим», — дейди 25 ёшли куёв.
Маълум қилинишича, ўша вақтда келин-куёв ўртасида сюрприз ўйини ўтказилган ва куёв ширинликни ўзидан биринчи очган келиннинг бошига урган.
Ижтимоий тармоқларда улар қонуний никоҳдан ўтмаган деган фикрлар ҳам тарқалган. Аниқланишича, улар 22 май куни ФҲДЁга ариза берган. Бундан ташқари, тўй куни келиннинг онаси қизини саҳнадан тушириб, уйига олиб кетди деган тахминлар ҳам ўз тасдиғини топмаган.
«Узр сўрашганидан кейин, тўй давом этди. Телефонда гаплашиб турибмиз, яхши яшаяпмиз деяпти», — дейди она.
Мазкур ҳолат жиноят ишлари бўйича Узун тумани суди томонидан ўрганиб чиқилган, келиннинг даъво эътирози бўлмагани учун йигитга маъмурий жарима қўлланмайдиган бўлган.
Бундан олдинроқ Миллий масс-медиани қўллаб қувватлаш ва ривожлантириш жамоат фонди Васийлик кенгаши раиси ўринбосари, Ўзбекистонда гендер тенглигини таъминлаш комиссияси аъзоси Саида Мирзиёева ҳолатга муносабат билдириб, «бундай ҳолатларни хотиржам кузатиш мумкин эмас»лигини таъкидлаганди. Олий Мажлис Сенати Хотин қизлар ва гендер тенглик масалалари қўмитаси эса бу каби салбий ҳолатларнинг олдини олиш мақсадида Сенатда хотин-қизлар ва болаларнинг ҳуқуқлари, эркинликлари ҳамда қонуний манфаатларини ишончли ҳимоя қилишга қаратилган қонунчиликни такомиллаштириш масалалари юзасидан ишчи гуруҳ тузилганини маълум қилган.
Изоҳ (0)