Qarshida Nexia oynasidan oyoqlarini chiqarib harakatlangan mast ayol jarimaga tortildi (video)

Qarshi shahrida taksi oynasidan oyoqlarini chiqarib ketayotgan ayol YPX xodimlarining talabiga bo‘ysunmay, ularni haqorat qildi, deb xabar beradi “Nasaf TV”.

Ma’lum qilinishicha, Qarshi shahrida olib borilgan reyd tadbirlari davomida taksichilik bilan shug‘ullanuvchi Nexia avtomobili to‘xtatilgan. Haydovchi bilan muloqotga kirishilganda, mashinada yo‘lovchi sifatida ketayotgan ayol vaziyatga aralashib, munozarali holatni keltirib chiqaradi.

Uzoq tortishuvlardan so‘ng, ayol tibbiy tekshiruvlarga taklif etilgan, biroq ayol IIB xodimlariga qarshilik ko‘rsatgan va ularni haqorat qilishga tushgan.

Tibbiy tekshiruv jarayonida ayolning mastligi aniqlanib, jamiyatda yurish qoidalarini buzgani yuzasidan ma’muriy ish ochilgan.

Jinoyat ishlari bo‘yicha Qarshi shahar sudida ko‘rib chiqilgan ishda ayol qilgan ishidan pushaymonligini bildirib, voyaga yetmagan farzandi borligi sabab qonuniy yengillik so‘ragan. Ma’muriy javobgarlik to‘g‘risidagi kodeksning 194-modda (O‘zbekiston Respublikasi Milliy gvardiyasi harbiy xizmatchisining (xodimining) qonuniy talablarini bajarmaslik) 1-qismi bilan BHMning 5 baravari (1,5 million so‘m) miqdorida jarima tayinlangan.

Bundan oldin Sirdaryoda mashina oynasidan oyog‘ini chiqarib harakatlangan haydovchi jazolangani to‘g‘risida xabar berilgandi.