Toshkentda bolalarga noqonuniy ravishda diniy ta’lim berishda gumonlangan er-xotin aniqlandi, deya xabar qilmoqda poytaxt IIBB.
Toshkent shahar Ichki ishlar bosh boshqarmasi va DXX xodimlari, Sergeli tumanida o‘tkazilgan profilaktik tadbirlar davomida, xususiy uylardan birida yashovchi 37 yoshli O.A. va uning turmush o‘rtog‘i 35 yoshli M.A. tegishli ruxsatsiz 15 nafar voyaga yetmagan bolalarga diniy adabiyotlardan foydalangan holda dars o‘tgan. Voqea joyidan diniy adabiyotlar va mobil telefonlar topilib, ashyoviy dalil sifatida olingan.
Mazkur holat yuzasidan ushbu shaxslarga nisbatan Ma’muriy javobgarlik to‘g‘risidagi kodeksning 241-moddasiga (diniy ta’limotdan saboq berish tartibini buzish) asosan tegishli hujjatlar rasmiylashtirilgan.
Shuningdek, holatni o‘rganish jarayonida, bolalarga muntazam ravishda psixologik va jismoniy tazyiq o‘tkazilgani ma’lum bo‘lgan. Ularga nisbatan jismoniy kuch ishlatilgan.
Mazkur holat yuzasidan IIO xodimlari tomonidan tergovga qadar tekshiruv olib borilmoqda. Voyaga yetmagan bolalarga yetkazilgan tan jarohatlarining og‘irligini aniqlash maqsadida sud-tibbiy ekspertizasi tayinlandi. Tekshiruv natijalariga ko‘ra qonuniy qaror qabul qilinadi.
Izoh (0)