Ташқи ишлар вазири вазифасини бажарувчи Владимир Норов 17 июнь куни Франциянинг Ўзбекистондаги фавқулодда ва мухтор элчиси Орелия Бушезни қабул қилди. Бу ҳақда ТИВ ахборот хизмати хабар қилди.
Қайд этилишича, учрашувда Ўзбекистон—Франция кун тартибининг турли жиҳатлари муҳокама қилинган. Мулоқот чоғида кўп томонлама тузилмалар, хусусан, расмий Парижнинг Европа Иттифоқи кенгашидаги раислигини ҳисобга олган ҳолда ўзаро ҳамкорликка алоҳида эътибор қаратилган.
Турли даража ва шаклларда режалаштирилган мулоқотлар жадвали бўйича таклифлар кўриб чиқилган.
Таъкидланишича, Франциянинг «Medef Internatsional» ишбилармонлар доираси ассоциацияси Ўзбекистонга ташриф буюради. Бу савдо-иқтисодий алоқаларни фаоллаштириш ҳамда мамлакатда Франция капитали иштирокидаги истиқболли инвестициявий лойиҳаларни амалга оширишга хизмат қилади.
Томонлар 2022 йил ноябрь ойида Париждаги Араб дунёси институтида ва Лувр музейида «Марказий Осиёнинг улуғворлиги. Ўзбекистон карвон йўлларида» ҳамда «Яктак ва чопон» номли ўргазмалар ўтказилиши режалаштирилаётганини инобатга олган ҳолда маданий-гуманитар ҳамкорликни кенгайтириш борасида ўзаро қизиқиш билдирган.
Шунингдек, айрим халқаро ва минтақавий мавзулар юзасидан фикр алмашилган.
Аввалроқ Владимир Норов Покистон ва Уммоннинг Ўзбекистондаги элчилари билан учрашгани, Вьетнамнинг Ўзбекистондаги янги элчисидан ишонч ёрлиқларини қабул қилгани ҳақида хабар берилган.
Изоҳ (0)