Buxoro viloyatining Peshko‘ tumanida turmush o‘rtog‘ini pichoqlab, unga og‘ir tan jarohati yetkazgan 27 yoshli ayolga sud hukmi o‘qildi. Bu haqda “Daryo”ga jinoyat ishlari bo‘yicha Peshko‘ tuman sudi sudyasi Farrux Ikromov xabar berdi.
Sud hujjatlarida qayd etilishicha, Peshko‘ tumanining Qo‘rg‘ontepa qishlog‘ida tug‘ilgan F.Z. 2018-yil Afshona qishlog‘ida yashovchi N.J. bilan turmush qurib, 2021-yilning yanvar oyiga qadar birga yashagan. Biroq erining muntazam ravishda spirtli ichimliklar iste’mol qilishi oilada kelishmovchilik, janjal va tortishuvlarning kelib chiqishiga sabab bo‘lgan.Turmush tashvishlaridan bezgan F.Z. bir nafar voyaga yetmagan farzandini olib, Afshona qishlog‘idagi xonadonlardan birida ijarada turib yashay boshlagan.
2022-yilning 25-may kuni F.Z. turmush o‘rtog‘iga qo‘ng‘iroq qilib, farzandini yolg‘iz o‘zi boqishda qiynalayotganini aytib, unga ovqat keltirib berishini so‘ragan. To‘yxonada mast holda o‘tirgan er xotiniga to‘yxonaning ovqatidan olib borgan. Ayol erini mast holda kelgani yetmagandek yuvindi ovqat keltirganlikda ayblagan. So‘ng ular o‘zaro tortishib qolgan. Shunda ayol opasining uyiga ketishini aytib, uydan chiqib ketayotganda eri uning qo‘lidan tortib, xonadon ichkarisiga kiritgan. Hamda yuziga ikki marotaba urgan. Ayol baqir-chaqir qilgan va uyiga kirib ketgan. Birozdan so‘ng esa qo‘lida pichoq bilan chiqib, pichoqni erining qorniga urgan. J.N. esa shunday holatda ham bir qo‘li bilan F.Z.ning bo‘ynidan bo‘g‘gan va ikkinchi qo‘li bilan qornida sanchilib qolgan pichoqni sug‘urib olgan. Shunda pichoq o‘rnidan qon keta boshlagan.
Odamlar voqea joyiga yig‘ila boshlagan. Erkak esa shu holatda velosipedini minib, ketishga uringan. Ukasiga qo‘ng‘iroq qilib, ahvoli haqida xabar bergan. Ammo yarim yo‘lda hushini yo‘qotgan. Shunda qishloqdoshlari uni Peshko‘ tuman tez tibbiy yordam bo‘limiga olib borgan.
Sud ayolning xatti-harakatlarida Jinoyat kodeksining 104-moddasi 2-qismi “l” bandi (qasddan badanga og‘ir shikast yetkazish) da ko‘rsatilgan jinoyat alomatlari bor degan to‘xtamga kelib, ayolning qilmishidan pushaymonligi, oilaviy sharoiti va qaramog‘ida uch yoshli voyaga yetmagan farzandi borligini inobatga olib, unga 5 yil muddatga ozodlikni cheklash jazosini tayinlagan.
Izoh (0)