Dushanbe—Toshkent—Dushanbe yo’nalishidagi 301/302-sonli yo‘lovchi poyezdi 20-iyundan boshlab harakatlanishni boshlaydi. Bu haqda “O‘zbekiston temir yo‘llari” xabar qildi.
Qayd etilishicha, mazkur poyezd Dushanbedan haftaning dushanba kunlari jo‘nab ketadi va seshanba kunlari soat 13:43 da Toshkentga yetib keladi. Toshkentdan haftaning har seshanba kuni soat 16:15 da jo‘nab ketib, Dushanbega chorshanba kuni yetib boradi.
Toshkentdan Dushanbegacha temiryo‘l orqali bo‘lgan masofa 916 kilometrni tashkil etadi. Poyezd 21 soat davomida harakatlanadi.
Poyezd 10 ta vagon: 4 kupe, 5 plaskart va vagon-restorandan iborat.
Sotuv muddatiga qarab chegirmalarni hisobga olgan holda chipta narxi 381 ming 476 so‘mdan boshlanadi.
Ma’lumot uchun, Dushanbe—Toshkent yo‘nalishi bo‘yicha yo‘lovchi poyezdlari harakati 1990-yillar boshida to‘xtatib qo‘yilgan. 2-iyun kuni Toshkentda o‘tkazilgan O‘zbekiston va Tojikiston prezidentlarining qo‘shma brifingida poyezd qatnovini tiklash bo‘yicha kelishuvga erishilgan.
Eslatib o‘tamiz, 2021-yilning oktabrida Toshkent–Xo‘jand–Toshkent xalqaro avtobus yo‘nalishida muntazam qatnovlar qayta tiklangandi. 2022-yilning aprelida esa O‘zbekiston va Tojikiston o‘rtasidagi qator avtobus qatnovlari tajriba-sinov tariqasida tiklangan.