Бухоро вилоятининг Пешкў туманида турмуш ўртоғини пичоқлаб, унга оғир тан жароҳати етказган 27 ёшли аёлга суд ҳукми ўқилди. Бу ҳақда «Дарё»га жиноят ишлари бўйича Пешкў туман суди судьяси Фаррух Икромов хабар берди.

Суд ҳужжатларида қайд этилишича, Пешкў туманининг Қўрғонтепа қишлоғида туғилган Ф.З. 2018 йил Афшона қишлоғида яшовчи Н.Ж. билан турмуш қуриб, 2021 йилнинг январь ойига қадар бирга яшаган. Бироқ эрининг мунтазам равишда спиртли ичимликлар истеъмол қилиши оилада келишмовчилик, жанжал ва тортишувларнинг келиб чиқишига сабаб бўлган.

Турмуш ташвишларидан безган Ф.З. бир нафар вояга етмаган фарзандини олиб, Афшона қишлоғидаги хонадонлардан бирида ижарада туриб яшай бошлаган.

2022 йилнинг 25 май куни Ф.З. турмуш ўртоғига қўнғироқ қилиб, фарзандини ёлғиз ўзи боқишда қийналаётганини айтиб, унга овқат келтириб беришини сўраган. Тўйхонада маст ҳолда ўтирган эр хотинига тўйхонанинг овқатидан олиб борган. Аёл эрини маст ҳолда келгани етмагандек ювинди овқат келтирганликда айблаган. Сўнг улар ўзаро тортишиб қолган. Шунда аёл опасининг уйига кетишини айтиб, уйдан чиқиб кетаётганда эри унинг қўлидан тортиб, хонадон ичкарисига киритган. Ҳамда юзига икки маротаба урган. Аёл бақир-чақир қилган ва уйига кириб кетган. Бироздан сўнг эса қўлида пичоқ билан чиқиб, пичоқни эрининг қорнига урган. Ж.Н. эса шундай ҳолатда ҳам бир қўли билан Ф.З.нинг бўйнидан бўғган ва иккинчи қўли билан қорнида санчилиб қолган пичоқни суғуриб олган. Шунда пичоқ ўрнидан қон кета бошлаган.

Одамлар воқеа жойига йиғила бошлаган. Эркак эса шу ҳолатда велосипедини миниб, кетишга уринган. Укасига қўнғироқ қилиб, аҳволи ҳақида хабар берган. Аммо ярим йўлда ҳушини йўқотган. Шунда қишлоқдошлари уни Пешкў туман тез тиббий ёрдам бўлимига олиб борган.

Суд аёлнинг хатти-ҳаракатларида Жиноят кодексининг 104-моддаси 2-қисми «л» банди (қасддан баданга оғир шикаст етказиш) да кўрсатилган жиноят аломатлари бор деган тўхтамга келиб, аёлнинг қилмишидан пушаймонлиги, оилавий шароити ва қарамоғида уч ёшли вояга етмаган фарзанди борлигини инобатга олиб, унга 5 йил муддатга озодликни чеклаш жазосини тайинлаган.