Qozog‘istonning Turkiston viloyatida noqonuniy ravishda kavrak o‘simligini terish bilan shug‘ullanib kelgan 51 nafar xorijlik fuqaro aniqlandi, deb xabar beradi “Zakon.kz”.
“O‘tror tumani politsiya bo‘limi xodimlari tomonidan o‘tkazilgan profilaktika tadbirlari davomida Qoraqo‘ng‘ir qishloq okrugi dasht kengliklarida shifobaxsh kavrakni yig‘ish bilan shug‘ullangan 51 nafar xorijlik aniqlandi. Ularning 31 nafari — O‘zbekiston, 17 nafari esa Tojikiston fuqarolaridir”, — deyiladi xabarda.
Qozog‘iston politsiyasi holat bo‘yicha ma’muriy bayonnoma rasmiylashtirgan va sud qaroriga ko‘ra xorij fuqarolari mamlakatdan chiqarib yuborilgan.
Eslatib o‘tamiz, aprel oxirlarida O‘zbekistonda “Respublikada kavrak yetishtirishni rivojlantirish va sanoatlashtirishni rag‘batlantirishga doir qo‘shimcha chora-tadbirlar to‘g‘risida”gi prezident farmoni qabul qilingandi. Farmon bilan “Kavrak yetishtiruvchilar va eksport qiluvchilar” uyushmasi “Yaylov xo‘jaligini rivojlantirish” uyushmasiga qo‘shib olingan. Farmon bilan 2022–2026-yillarda yaylov yer maydonlarida kavrak plantatsiyalarini barpo etishning prognoz ko‘rsatkichlari tasdiqlangan edi.
Izoh (0)