Fransiyaning Shatoru shahrida para o‘q otish bo‘yicha o‘tkazilgan Jahon kubogida O‘zbekiston sharafini himoya qilgan Server Ibragimov Parij—2024 ga yo‘llanma oldi.
2022-yilning 4—12-iyun kunlari o‘tkazilgan musobaqada Ibragimov erkaklar o‘rtasida 50 metrga to‘pponchadan otish bo‘yicha bahslarda 200,7 ochko jamg‘argan holda bronza medaliga, 10 metrga pnevmatik to‘pponchadan otish bo‘yicha bahslarda esa 217,1 ochko jamg‘arib kumush medalga sazovor bo‘ldi.
Server Ibragimov ushbu natijasi bilan O‘zbekiston delegatsiyasi hisobiga 2 ta medalni yozdirib qo‘yish bilan bir qatorda, 2024-yil Parijda bo‘ladigan XVII yozgi Paralimpiya o‘yinlariga to‘g‘ridan to‘g‘ri litsenziyani ham qo‘lga kiritdi.
Qayd etish kerak, Server Parij—2024 ga litsenziya qo‘lga kiritgan ilk o‘zbekistonlik sportchiga aylandi.
Server Ibragimov para o‘q otish bo‘yicha bir necha bor Jahon va Osiyo chempionatlari sovrindori, shuningdek Rio—2016 yozgi Paralimpiya o‘yinlari bronza medali sohibi hisoblanadi.
Izoh (0)