AnTuTu benchmarki ekspertlari may oyida global bozorda sotilgan barcha Android va iOS qurilmalarining reytingini e’lon qildi, deb xabar beradi Hi-Tech.Mail.ru.
Ta’kidlash kerakki, reyting ro‘yxatidagi raqamlar 2022-yilning 1-mayidan 31-mayiga qadar bo‘lgan ma’lumotlarga tayangan. Natijalarda eng yuqori emas, o‘rtacha ballar ifodalangan.
Android qurilmalar orasida birinchi o‘rinni Red Magic 7 egallagan — geymerlar uchun mo‘ljallangan Snapdragon 8 Gen 1 birinchi smartfon, u yil boshida taqdim etilgandi.
Ikkinchi va uchinchi o‘rinlarni mos ravishda tasvirlarni qayta ishlashga mo‘ljallangan noyob V1+ chipiga ega Vivo X80 Pro hamda geymerlarning Poco F4 GT “maxluqi” egallagan. E’tiborli jihati, yetakchi o‘rinlarni band etgan barcha smartfonlar Snapdragon 8 Gen 1 protsessorida ishlaydi.
iOS-qurilmalar reytingida (nafaqat smartfonlar, balki Apple’ning boshqa mahsulotlari ham qatnashgan) o‘zgarish u qadar katta emas. Dastlabki ikki o‘rinni M1 chiplari o‘rnatilgan iPad Pro 5 planshetlari egallagan. Ular 2021-yilning aprelida taqdim etilgandi.
Avvalroq Apple M1 ning yangi avlodi — M2 ni taqdim etgandi. Yangi protsessor WWDC 2022 konferensiyasida namoyish etilgan. Mazkur protsessorning quvvati 18 foizga oshgan, grafik jihatdan esa 35 foizga yaxshilangan. M2 protsessorida ishlaydigan birinchi qurilma yangi MacBook Air bo‘ladi.