Xiaomi kompaniyasi Redmi Note 11 lineykasidagi yangi smartfonlari — 11T pro va 11T Pro, shuningdek, Redmi Buds 4 hamda Buds 4 Pro naushniklarini taqdim etdi, deb xabar beradi GSMArena.
Redmi Note 11T Pro
Smartfonlar Full HD+ sifatni va 144 gertsli tasvir yangilanish chastotasini qo‘llab-quvvatlaydigan 6,5 dyuymli IPS-ekranlar bilan jihozlangan. Displeylar Corning Gorilla Glass 5 shishasi bilan qoplangan, barmoq izi skaneri o‘chirib-yoqish tugmasiga o‘rnatilgan. Yangi model korpusi IP53 standarti bo‘yicha himoyalangan — u yengil yomg‘irga bardosh bera oladi.
Apparat ichidan MediaTek Dimensity 8100 protsessori, 6 yoki 8 gigabayt tezkor hamda 128/256/512 gigabayt ichki xotira o‘rin oladi. Note 11T Pro’ning akkumulyator sig‘imi 5080 mA/soatga teng bo‘lib, 67 vattli tezkor quvvatlanish funksiyasiga ega. 11T Pro+ modeliga esa sig‘imi 4400 mA/soatli akkumulyator o‘rnatilgan — 120 vattli tezkor quvvatlanish funksiyasi mavjud.
Smartfonlarga kameralar soni to‘rtta: 64 megapikselli asosiy (Samsung GW1), 8 megapikselli keng burchak (Samsung 4H7, 120 daraja), 2 megapikselli makro va 16 megapikselli frontal.
Xitoyda Redmi Note 11T Pro lineykasi 31-maydan boshlab qora, ko‘k va kumush ranglarida sotuvga chiqadi.
Rasmiy narxlar:
- Note 11T Pro 6/128 GB — 255 dollar;
- Note 11T Pro 8/256 GB — 315 dollar;
- Note 11T Pro+ 8/128 GB — 300 dollar;
- Note 11T Pro+ 8/256 GB — 330 dollar;
- Note 11T Pro+ 8/512 GB — 360 dollar;
- Note 11T Pro+ Astro Man 8/256 GB — 375 dollar.
Redmi Buds 4 va Buds 4 Pro
Bazaviy model 35 detsibelgacha faol shovqin so‘ndiruvchi 10 millimetrli drayverga ega bo‘lgan. Naushniklar g‘ilofsiz 6 soatgacha, g‘ilof bilan esa 30 soatgacha ishlay oladi. Xitoydagi rasmiy narxi — 30 dollar.
Pro-versiya birinchi modeldan katta farq qiladi va tashqi ko‘rinishi bilan Apple AirPods Pro’ni yodga soladi. Naushnik 45 detsibelgacha faol shovqin so‘ndiruvchi 10 millimetrli drayverga va olti millimetrli tviterga ega. Gadjet keyssiz 9 soatgacha, keys bilan esa 36 soatgacha ishlay oladi. Qurilmaning Xitoydagi rasmiy narxi 55 dollarni tashkil etadi.
Avvalroq xitoyliklar bir marta quvvatlanish orqali 45 kungacha ishlay oladigan smart-soatni taqdim etgani, Xiaomi yuzni tanish funksiyasiga ega “aqlli” eshikni ixtiro qilgani to‘g‘risida xabar berilgandi.
Izoh (0)