Yevropaning kuchli beshlik chempionatlari o‘z yakuniga yetdi. Aksariyat jamoalar ta’tilga chiqishga ham ulgurdi. Chempionatlar yakunlangach, bir qator yulduz futbolchilar o‘z jamoalari bilan xayrlashdi yoki umuman katta sportdagi faoliyatini tugatdi. Ular orasida Paulo Dibala, Anxel di Mariya, Erling Holand, Luis Suares kabi nomlarni uchratish mumkin. Quyida top-5 ligalardagi xayrlashuvlar bir sahifaga jamlandi.
Luis Suares va Ektor Errera
“Atletiko M” mavsum yakunlariga ko‘ra Luis Suares (u Madridda 2020-yildan beri o‘ynab kelayotgandi, “Barselona”dan quvilganidan keyin “matraschi”ga aylangandi) va Ektor Errera (2019-yildan beri) bilan xayrlashdi. Va bu jarayonda hech kim o‘z his-tuyg‘ularini yashirib o‘tirmadi.
Meksikalik va urugvaylik futbolchilar o‘z nutqlari bilan chiqish qildi, ular uchun (sobiq) jamoadoshlari faxriy yo‘lakcha tashkil qildi, muxlislar esa bularning barchasini chiroyli qo‘shiqlar bilan kuzatib bordi.
Butun faoliyatini “Vest Hem”ga bag‘ishlagan janob “Vest Hem” — Mark Nobl
Angliya Premyer Ligasidagi asosiy xayrlashuv “Vest Hem” ramzi bo‘lgan Mark Nobl uchun tashkil qilindi. Nobl 18,5 yil umrini “Vest Hem”ga bag‘ishlagan — 548 o‘yin, 62 gol va 61 golli uzatma.
U uchun so‘nggi o‘yinda o‘ziga qo‘shilib, butun stadion yig‘ladi.
“Napoli” bilan xayrlashgan Lorenso Insinye
“Napoli” A Seriyaning so‘nggi turida “Jenoa”ni 3:0 hisobida mag‘lub etdi va bronza medalini kafolatladi. Ammo o‘yin natijasi ikkinchi darajali edi, boisi barcha fokus Lorenso Insinyega qaratilgandi, yarim himoyachi qadrdon jamoasi bilan iliq xayrlashdi.
Insinye “Napoli” safida 433 ta o‘yin o‘tkazgan — 122 ta gol va 95 ta golli uzatma. Neapol afsonasi endi “Toronto”da (MLS) futboldan zavqlanishda davom etadi.
“Ayaks”ni “Manchester Yunayted”ga almashtirgan Erik Ten Hag
“Ayaks” muddatidan avval chempionlik masalasini hal qilgandi. Bu Erik uchun uchinchi, Amsterdam klubi uchun esa o‘ttiz oltinchi (36) chempionlik bo‘ldi.
Mutaxassis so‘nggi turdan o‘rin olgan “Vitess”ga qarshi bahsda (2:2) jamoa bilan xayrlashdi. Biroq niderlandiyalik uzoq vaqt bayram qilib o‘tirmadi, ertasi kuniyoq “Yunayted” muammolarini hal qilish uchun Manchesterga yo‘l oldi.
Jahon futbolining yangi yulduzi Holand o‘zini elga tanitgan “Borussiya D” bilan xayrlashdi
Xayrlashuv ro‘yxatining asosiy qahramonlaridan biri Erling Holand bo‘ldi. Norvegiyalik futbolchi o‘yin boshlanishidan avval muxlislar qarshisiga bordi, tomonlar qarsaklar orqali bir-biriga minnatdorchilik bildirdi.
Holand 90-daqiqadan so‘ng almashtirildi, tribuna uni yana olqishlar bilan zaxira o‘rindig‘iga kuzatib qo‘ydi. Erling Dortmundni 89 o‘yinda 86 ta gol urgan holda aql bovar qilmas darajadagi zo‘r statistika bilan tark etmoqda. “Arilar” muxlislari yaqin orada uni unutmasligi aniq.
“Bavariya”da zerikkan Robert Levandovski
Robert Levandovski ham Bundesliganing so‘nggi turida “Bavariya”dan ketishiga shama qildi. “Bu ‘Bavariya’ libosidagi so‘nggi o‘yinim bo‘lishi mumkin”, — dedi polshalik “Volfsburg”ga qarshi o‘yindan keyin.
Bundesliganing so‘nggi turidan bir kun oldin Hasan Salihamijich Levandovskining ketish niyatida ekanligini tasdiqlagandi: “U shartnomani uzaytirish bo‘yicha taklifimizni qabul qilmasligini va klubni tark etishni xohlayotganini aytdi. U yangi narsalarni istayotganini aytdi”.
O‘ynamay “Manchester Yunayted”dan ketayotgan Mata va Matich
May oyida “Old Trafford” ham bir qancha futbolchilar bilan xayrlashdi. “Brentford”ga qarshi o‘yinning (3:0) ikkinchi bo‘limida Ral Rangnik Xuan Mata va Nemanya Matichni maydonga tushirib, muxlislarga ketayotgan futbolchilarga minnatdorchilik bildirish imkoniyatini berdi.
“Yuventus”dan ho‘ngrab ketayotgan Dibala
Mavsumning asosiy xayrlashishlaridan biri, shubhasiz, Paulo Dibala va “Yuventus” yo‘llarining ayro tushishidir. Dibala so‘nggi yillarda tom ma’noda “Yuventus” ramziga aylangandi.
Dibala Turinda 7 yilini o‘tkazdi — 12 ta sovrin va 115 ta gol.
“Yuventus”ni tabassum bilan tark etgan “dinozavr” Kyellini
Jorjo Kyellini ham “keksa sinyora” bilan xayrlashdi. Ming yillardan beri “Yuventus”da o‘ynab kelayotgandek tuyuladigan “dinozavr” “Latsio”ga qarshi uchrashuvda (2:2) jamoa safidagi oxirgi uchrashuvini o‘tkazdi. 37 yoshli italiyalik chiroyli ketdi: na ko‘z yosh va na qayg‘u, shunchaki katta va yorqin tabassum.
“PSJ” voz kechgan di Mariya
34 yoshli Anxel di Mariya “PSJ” safidagi so‘nggi o‘yinini ko‘z yoshlarisiz o‘tkaz(ol)madi. “Mets”ga qarshi o‘yindagi gol esa hissiyotlarni yanada kuchaytirib berdi. Anxel Parijda yetti yil davomida harakat qildi va, ehtimol, bundan keyin ham o‘ynagan bo‘lardi. Biroq “PSJ” uning xizmatlaridan voz kechgani aytilmoqda.
Le Parisien xabariga ko‘ra, qishda fransuz klubi 34 yoshli futbolchi bilan shartnomani uzaytirishga og‘zaki kelishib olgan. Biroq keyin jamoa rahbariyati o‘z fikrini o‘zgartirgan — di Mariyaga yangi kelishuv taklif qilinmagan.
Bir mavsumgina “Barselona”da o‘ynagan Lyuk de Yong
“Barselona”ning o‘tgan mavsumdagi yashirin qurollaridan biri bo‘lgan Lyuk de Yong Kataloniya klubini tark etadi. Butun ijara muddati davomida Lyuk jamoadan ketishni istamasligini va klubga foyda keltirmoqchi ekanligini ta’kidlab keldi. Biroq rahbariyatning rejalari boshqacha bo‘lib chiqdi. Niderlandga atigi bir mavsumgina “ko‘k-anorrangli” bo‘lish nasib etdi.
Ketishini chempionlik bilan nishonlagan Fernandinyo
“Manchester Siti” navbatdagi haykalni qo‘yaversa ham bo‘ladi. Boisi jamoa “shaharliklar” uchun Serxio Aguerodan kam bo‘lmagan darajada muhim Fernandinyo bilan xayrlashdi. Braziliyalik yarim himoyachi o‘zi rejalashtirganidek, Premyer Liga g‘olibi sifatida “Siti”dan ketdi. 37 yoshli futbolchi 2013-yildan beri “shaharlik” edi.
“Real”dan ketayotgan katta nomlar
Mavsum yakunlariga ko‘ra “Real” bilan bir-yo‘la uch nafar katta futbolchi xayrlashadigan bo‘ldi — Marselo, Garet Beyl va Isko. So‘nggi yillarda har uchala futbolchi ham asosiy tarkibdagi o‘rnidan to‘laligicha mahrum bo‘lgandi.
Isko va Marselo garchi ketishni istamasligini yashirib o‘tirmagan bo‘lsa ham, jamoa bilan iliq kayfiyatda xayrlashmoqda. Ammo Beyl haqida bunday deyish biroz mushkul. Uelslik jarohatlari va ishga bo‘lgan munosabati bilan Zinedin Zidan davridayoq turli xil nizolarga borgandi. Hatto orada “Tottenhem”ga ijaraga ham borib keldi.
Zaxirada o‘tirib, yaxshigina maosh olgan har uchala azamat endilikda erkin agentga aylandi. Beyl va Isko 2013, Marselo 2007-yildan beri “qirollik klubi” sharafini himoya qilib kelayotgandi, u bungacha “Fluminense”da bir yilgina o‘ynagandi. Xullas, butun boshli epoxa ketmoqda.
Pol Pogba endi “qizil iblis” emas
Pol Pogba “Manchester Yunayted”ni erkin agent sifatida tark etadi. “Yunayted” fransiyalik futbolchini 2016-yilda 105 million yevro evaziga “Yuventus”dan xarid qilgan edi. Ungacha Pogba 2009—2012-yillar klub tizimida faoliyat yuritgan va erkin agent maqomida Turinga yo‘l olgandi.29 yoshli yarim himoyachi katta ehtimol bilan yana “keksa sinyora” safiga borib qo‘shiladi, yana erkin agent sifatida.
Shuningdek, “qizillar” Jessi Lingard bilan xayrlashdi. Klub akademiyasi tarbiyalanuvchisi hisoblangan yarim himoyachiga yangi shartnoma taklif qilinmadi.
Izoh (0)