Европанинг кучли бешлик чемпионатлари ўз якунига етди. Аксарият жамоалар таътилга чиқишга ҳам улгурди. Чемпионатлар якунлангач, бир қатор юлдуз футболчилар ўз жамоалари билан хайрлашди ёки умуман катта спортдаги фаолиятини тугатди. Улар орасида Пауло Дибала, Анхель ди Мария, Эрлинг Ҳоланд, Луис Суарес каби номларни учратиш мумкин. Қуйида топ-5 лигалардаги хайрлашувлар бир саҳифага жамланди.
Луис Суарес ва Эктор Эррера
«Атлетико М» мавсум якунларига кўра Луис Суарес (у Мадридда 2020 йилдан бери ўйнаб келаётганди, «Барселона»дан қувилганидан кейин «матрасчи»га айланганди) ва Эктор Эррера (2019 йилдан бери) билан хайрлашди. Ва бу жараёнда ҳеч ким ўз ҳис-туйғуларини яшириб ўтирмади.
Мексикалик ва уругвайлик футболчилар ўз нутқлари билан чиқиш қилди, улар учун (собиқ) жамоадошлари фахрий йўлакча ташкил қилди, мухлислар эса буларнинг барчасини чиройли қўшиқлар билан кузатиб борди.
Бутун фаолиятини «Вест Ҳем»га бағишлаган жаноб «Вест Ҳем» — Марк Нобл
Англия Премьер Лигасидаги асосий хайрлашув «Вест Ҳем» рамзи бўлган Марк Нобл учун ташкил қилинди. Нобл 18,5 йил умрини «Вест Ҳем»га бағишлаган — 548 ўйин, 62 гол ва 61 голли узатма.
У учун сўнгги ўйинда ўзига қўшилиб, бутун стадион йиғлади.
«Наполи» билан хайрлашган Лоренцо Инсине
«Наполи» А Сериянинг сўнгги турида «Женоа»ни 3:0 ҳисобида мағлуб этди ва бронза медалини кафолатлади. Аммо ўйин натижаси иккинчи даражали эди, боиси барча фокус Лоренцо Инсинега қаратилганди, ярим ҳимоячи қадрдон жамоаси билан илиқ хайрлашди.
Инсине «Наполи» сафида 433 та ўйин ўтказган — 122 та гол ва 95 та голли узатма. Неапол афсонаси энди «Торонто»да (MLS) футболдан завқланишда давом этади.
«Аякс»ни «Манчестер Юнайтед»га алмаштирган Эрик Тен Ҳаг
«Аякс» муддатидан аввал чемпионлик масаласини ҳал қилганди. Бу Эрик учун учинчи, Амстердам клуби учун эса ўттиз олтинчи (36) чемпионлик бўлди.
Мутахассис сўнгги турдан ўрин олган «Витесс»га қарши баҳсда (2:2) жамоа билан хайрлашди. Бироқ нидерландиялик узоқ вақт байрам қилиб ўтирмади, эртаси куниёқ «Юнайтед» муаммоларини ҳал қилиш учун Манчестерга йўл олди.
Жаҳон футболининг янги юлдузи Ҳоланд ўзини элга танитган «Боруссия Д» билан хайрлашди
Хайрлашув рўйхатининг асосий қаҳрамонларидан бири Эрлинг Ҳоланд бўлди. Норвегиялик футболчи ўйин бошланишидан аввал мухлислар қаршисига борди, томонлар қарсаклар орқали бир-бирига миннатдорчилик билдирди.
Ҳоланд 90-дақиқадан сўнг алмаштирилди, трибуна уни яна олқишлар билан захира ўриндиғига кузатиб қўйди. Эрлинг Дортмундни 89 ўйинда 86 та гол урган ҳолда ақл бовар қилмас даражадаги зўр статистика билан тарк этмоқда. «Арилар» мухлислари яқин орада уни унутмаслиги аниқ.
«Бавария»да зериккан Роберт Левандовски
Роберт Левандовски ҳам Бундеслиганинг сўнгги турида «Бавария»дан кетишига шама қилди. «Бу ‘Бавария’ либосидаги сўнгги ўйиним бўлиши мумкин», — деди польшалик «Вольфсбург»га қарши ўйиндан кейин.
Бундеслиганинг сўнгги туридан бир кун олдин Ҳасан Салиҳамижич Левандовскининг кетиш ниятида эканлигини тасдиқлаганди: «У шартномани узайтириш бўйича таклифимизни қабул қилмаслигини ва клубни тарк этишни хоҳлаётганини айтди. У янги нарсаларни истаётганини айтди».
Ўйнамай «Манчестер Юнайтед»дан кетаётган Мата ва Матич
Май ойида «Олд Траффорд» ҳам бир қанча футболчилар билан хайрлашди. «Брентфорд»га қарши ўйиннинг (3:0) иккинчи бўлимида Рал Рангник Хуан Мата ва Неманя Матични майдонга тушириб, мухлисларга кетаётган футболчиларга миннатдорчилик билдириш имкониятини берди.
«Ювентус»дан ҳўнграб кетаётган Дибала
Мавсумнинг асосий хайрлашишларидан бири, шубҳасиз, Пауло Дибала ва «Ювентус» йўлларининг айро тушишидир. Дибала сўнгги йилларда том маънода «Ювентус» рамзига айланганди.
Дибала Туринда 7 йилини ўтказди — 12 та соврин ва 115 та гол.
«Ювентус»ни табассум билан тарк этган «динозавр» Кьеллини
Жоржо Кьеллини ҳам «кекса синьора» билан хайрлашди. Минг йиллардан бери «Ювентус»да ўйнаб келаётгандек туюладиган «динозавр» «Лацио»га қарши учрашувда (2:2) жамоа сафидаги охирги учрашувини ўтказди. 37 ёшли италиялик чиройли кетди: на кўз ёш ва на қайғу, шунчаки катта ва ёрқин табассум.
«ПСЖ» воз кечган ди Мария
34 ёшли Анхель ди Мария «ПСЖ» сафидаги сўнгги ўйинини кўз ёшларисиз ўтказ(ол)мади. «Мец»га қарши ўйиндаги гол эса ҳиссиётларни янада кучайтириб берди. Анхель Парижда етти йил давомида ҳаракат қилди ва, эҳтимол, бундан кейин ҳам ўйнаган бўларди. Бироқ «ПСЖ» унинг хизматларидан воз кечгани айтилмоқда.
Ле Parisien хабарига кўра, қишда француз клуби 34 ёшли футболчи билан шартномани узайтиришга оғзаки келишиб олган. Бироқ кейин жамоа раҳбарияти ўз фикрини ўзгартирган — ди Марияга янги келишув таклиф қилинмаган.
Бир мавсумгина «Барселона»да ўйнаган Люк де Ёнг
«Барселона»нинг ўтган мавсумдаги яширин қуролларидан бири бўлган Люк де Ёнг Каталония клубини тарк этади. Бутун ижара муддати давомида Люк жамоадан кетишни истамаслигини ва клубга фойда келтирмоқчи эканлигини таъкидлаб келди. Бироқ раҳбариятнинг режалари бошқача бўлиб чиқди. Нидерландга атиги бир мавсумгина «кўк-аноррангли» бўлиш насиб этди.
Кетишини чемпионлик билан нишонлаган Фернандиньо
«Манчестер Сити» навбатдаги ҳайкални қўяверса ҳам бўлади. Боиси жамоа «шаҳарликлар» учун Серхио Агуэродан кам бўлмаган даражада муҳим Фернандиньо билан хайрлашди. Бразилиялик ярим ҳимоячи ўзи режалаштирганидек, Премьер Лига ғолиби сифатида «Сити»дан кетди. 37 ёшли футболчи 2013 йилдан бери «шаҳарлик» эди.
«Реал»дан кетаётган катта номлар
Мавсум якунларига кўра «Реал» билан бир-йўла уч нафар катта футболчи хайрлашадиган бўлди — Марсело, Гарет Бэйл ва Иско. Сўнгги йилларда ҳар учала футболчи ҳам асосий таркибдаги ўрнидан тўлалигича маҳрум бўлганди.
Иско ва Марсело гарчи кетишни истамаслигини яшириб ўтирмаган бўлса ҳам, жамоа билан илиқ кайфиятда хайрлашмоқда. Аммо Бэйл ҳақида бундай дейиш бироз мушкул. Уэльслик жароҳатлари ва ишга бўлган муносабати билан Зинедин Зидан давридаёқ турли хил низоларга борганди. Ҳатто орада «Тоттенҳэм»га ижарага ҳам бориб келди.
Захирада ўтириб, яхшигина маош олган ҳар учала азамат эндиликда эркин агентга айланди. Бэйл ва Иско 2013, Марсело 2007 йилдан бери «қироллик клуби» шарафини ҳимоя қилиб келаётганди, у бунгача «Флуминенсе»да бир йилгина ўйнаганди. Хуллас, бутун бошли эпоха кетмоқда.
Пол Погба энди «қизил иблис» эмас
Пол Погба «Манчестер Юнайтед»ни эркин агент сифатида тарк этади. «Юнайтед» франциялик футболчини 2016 йилда 105 миллион евро эвазига «Ювентус»дан харид қилган эди. Унгача Погба 2009—2012 йиллар клуб тизимида фаолият юритган ва эркин агент мақомида Туринга йўл олганди.29 ёшли ярим ҳимоячи катта эҳтимол билан яна «кекса синьора» сафига бориб қўшилади, яна эркин агент сифатида.
Шунингдек, «қизиллар» Жесси Лингард билан хайрлашди. Клуб академияси тарбияланувчиси ҳисобланган ярим ҳимоячига янги шартнома таклиф қилинмади.
Изоҳ (0)