2022-yilning may oyida ham so‘mning real samarali almashuv kursi aprel oyiga nisbatan qariyb 1,8 foizga qadrsizlandi. Bu haqda Markaziy bank sharhidan ma’lum bo‘ldi.
Real samarali almashuv kursi tashqi savdo aylanmasi, inflyatsiya darajasi va asosiy savdo hamkorlarining valyuta kurslaridagi o‘zgarishlarni aks ettiruvchi ko‘rsatkichdir.
May oyida real samarali almashuv kursining qadrsizlanishiga asosan savdo-hamkor davlatlardagi yuqori inflyatsiya darajasi hamda valyuta kurslaridagi turli yo‘nalishdagi o‘zgarishlar bilan izohlanadi, — deydi Markaziy bank.So‘mga boshqa davlatlar valyuta kurslari o‘zgarishi ta’sir qiladi.
Rossiya rubli may oyida 19 foizga mustahkamlandi. Asosiy sabab — savdo balansi.
Qozog‘iston tengesi 5 foizga mustahkamlandi. Bu asosan xorijiy valyutaga bo‘lgan talabning stabillashgani hamda Rossiya rublining mustahkamlanishi bilan izohlanadi.
Turk lirasi 6 foizga qadrsizlandi. Inflyatsiyaning yuqori darajada saqlanib qolayotgani hamda neft mahsulotlarning qimmatlashishi Turkiya pul birligiga salbiy bosim o‘tkazmoqda.
May oyida Xitoyda kuzatilgan pandemiyaning yangi to‘lqini fonida yuan 4 foizga qadrsizlandi.
2022-yil may oyida asosiy savdo-hamkor davlatlarning deyarli barchasida inflyatsiya ko‘rsatkichi o‘sishda davom etdi, — deyiladi Markaziy bank sharhida.Meva va sabzavotlar bozorida narxlarning mavsumiy pasayishi, shuningdek, qurilish materiallari narxlariga bosimning saqlanib qolayotgani narxlarga ta’sir ko‘rsatmoqda.
Qozog‘istonda oylik inflyatsiya 1,4 foizni tashkil etib, yillik hisobda 14 foizga yetdi. Bunda oziq-ovqat mahsulotlari yillik 19 foizga o‘sdi.
Turkiyada oylik inflyatsiya 3 foizga yuqorilab, yillik hisobda 73,5 foizgacha o‘sdi. Narxlar o‘sishiga, asosan, yoqilg‘i hamda import mahsulotlari katta hissa qo‘shgan.
Shuningdek, mamlakatda ishlab chiqaruvchilar narxlari indeksi oylik hisobda 8,8 foizga o‘sib, yillik 132,2 foizga yetdi.
Izoh (0)