Xalqaro bolalar kuni arafasida Andijon shahar Fuqarolik holati dalolatnomalarini yozish bo‘limi tomonidan ota-onasining e’tiborsizligi sabab tug‘ilishi qayd qilinmagan to‘rt nafar bolaga tug‘ilganlik haqida guvohnomalar topshirildi. Bu haqda “Daryo” muxbiri Umidjon Mamarasulov xabar bermoqda.
Viloyat adliya boshqarmasi axborot xizmatining ma’lum qilishicha, O‘zbekiston prezidentining 2018-yil 12-iyundagi “Fuqarolik holati dalolatnomalarini qayd etish tizimini yanada takomillashtirish chora-tadbirlari to‘g‘risida”gi qarori ijrosini ta’minlash maqsadida hududlarda tashkil etilgan ishchi guruhlar tomonidan sayyor qabullar va uyma-uy yurishlar davomida fuqarolik holati dalolatnoma yozuvlari qayd etilgan yoki etilmaganlik holati o‘rganilib, muammolarni o‘z vaqtida hal qilish choralari ko‘rilmoqda.
Qayd etilishicha, 2022-yilning 5 oyi davomida ishchi guruh tomonidan aniqlangan 15 nafar turli yoshdagi fuqarolarning tug‘ilganligi sud qaroriga asosan Andijon shahar FHDY bo‘limi tomonidan qayd qilingan.
1-iyun – Xalqaro bolalar kuni arafasida Andijon shahar FHDY xodimlari tomonidan aka-singillar 2012-yilda tug‘ilgan Javohir hamda 2013-yilda tug‘ilgan Mushtariy Xajiyevalar, 2012-yilda tug‘ilgan Oyshabibi Malikova hamda 2018-yilda tug‘ilgan Xurshidabonu Rahmonovalarga tug‘ilganlik haqidagi guvohnomalari topshirilgan.
“Qizimiz tug‘ilganida turmush o‘rtog‘im Rossiyada ishlayotgan edi. Bundan tashqari o‘sha vaqtda qonuniy nikohimiz bo‘lmagani sababli o‘z vaqtida tug‘ilganligini qayd etaolmaganmiz. Qolgan ishga qor yog‘adi, deyishganidek ‘metrika’ olishimiz cho‘zilib ketdi. Hujjatsiz bog‘chaga ham, maktabga ham joylashtirish qiyin bo‘lgan. Gohida o‘qituvchilari hujjatlarini so‘rashganida javob berishga qiynalardik. Oradan o‘n yil o‘tgan bo‘lsada tug‘ilganligini qayd etib, guvohnoma berishdi. Bizga yordam qilgan barchadan minnatdormiz”, — deydi Oyshabibining onasi Umidaxon Xodjayeva.
Izoh (0)