Namangan shahridagi Zahiriddin Muhammad Bobur nomli madaniyat va istirohat bog‘i attraksionda sodir bo‘lgan hodisa videosi ijtimoiy tarmoqlarda tarqaldi. “Daryo” muxbiri Azizbek Abduvaliyev ushbu voqea tafsilotlarini o‘rgandi.
Joriy yil 3-iyun kuni mazkur boqqa otasi bilan kelgan bola attraksion oldiga borib, uni harakatlantirishga urinadi va kutilmaganda sirpanib ketib, yiqilib tushadi.
Bolaning otasi Ma’rufjon To‘xtaboyevning aytishicha, farzandi bilan boqqa kelgan payti Namangan shahridagi maktablarning birida 7-sinfda o‘qiyotgan o‘g‘li uning e’tiborsizligi tufayli attraksion oldiga borib qolgan va ushbu holat ro‘y bergan.
14 yashar Muhammadali Mahmudovning hozirda holati qoniqarli. Bola jarohat olmagan, shu sababli uning oila a’zolari tibbiyot muassasalariga murojaat qilmagan.
Namangan viloyat IIB matbuot xizmati rahbari Shokirjon Hoshimovning ma’lum qilishicha, Namangan shahar ichki ishlar organlari faoliyatini muvofiqlashtirish boshqarmasi va FVB vakillari hodisa joyida o‘rganish ishlarini olib borgan. Holat yuzasidan hujjatlar rasmiylashtirilib, surishtiruv harakatlari davom ettirilmoqda. Attraksion faoliyati esa vaqtincha to‘xtatilgan.
Izoh (0)