IT соҳасини эгаллаш учун алоҳида иқтидор ва яхши муҳит керак. Бу ҳақда 4 июнь куни Тошкент вилоятида бўлиб ўтган «mGovAward» танлови очилишида IT-Park директори Фарҳод Иброҳимов айтиб ўтди, дея хабар бермоқда «Дарё» мухбири.
Фарҳод Иброҳимовнинг айтишича, охирги пайтда IT соҳасида нафақат ўғил болалар, балки қизлар улуши ҳам ортиб бормоқда.
«Энг эътиборли масала, IT соҳасида қизлар сони аввалги йилларга қараганда анча ошган. Бу республикада таълим олиш масаласида аёлларнинг роли катталигини кўрсатади. «mGovAward» республика танлови ҳам ёшларни IT бўйича яратган лойиҳаларини баҳолаш ва уларга кўмак бериш учун ташкил қилинади. Кўп ёшлар бир нечта вилоятлар ва олий ўқув юртларидан бўлса-да, танловда бирга ҳужжат топшириб, жамоа бўлиб ишалашни ўрганмоқда. Биз IT соҳасини ўрганмоқчи бўлган болалар учун яхши шароит ва муҳит яратиб беришимиз керак ва бунинг устида ишлаяпмиз. Авваллари бугунгидек шароитлар йўқ эди. Бу соҳага қизиқувчи ёшлар бир неча йил олдин ҳам бугунги қизиқувчиларнинг 10 дан бирича ҳам чиқмасди. Ҳозир миллионлаб ёшлар IT’га қизиқади. IT ўқув марказларида ёшларни энг иқтдорлилари бирга билим олиб, ўсмоқда. Иқтидорли болалар учун ҳам жойлар яқин-яқингача етарли бўлмаган. Мана ҳозир шароит анча яхшиланяпти», – деди у.
Маълум қилинишича, танловда ғолиб бўлган ёшлар БАА ва IT-Park’да 6 ой ўқиш давомида акселерация дастуридан ўтиш имконига эга бўлади.
«Мазкур танловда қатнашиш учун ёшлар томонидан 900 та ариза топширилган ва финалга 20 та лойиҳа етиб келди. Энди шундан ҳам 3 таси ғолиб бўлади. 1-ўринни эгаллаган жамоа 50 минг доллар, 2-ўрин 30 минг доллар, 3-ўринни олган ёшлар 20 минг доллар мукофот билан тақдирланади», – деди Фарҳод Иброҳимов.
Аввалроқ Ўзбекистонда IT бўйича таълим олаётган талабаларнинг 30 фоизи қизлар экани маълум қилинганди.
Изоҳ (0)