“Barselona” Robert Levandovski transferi ustida ishlamoqda.
Kataloniyaliklar polshalik hujumchining mavsumoldi mashg‘ulotlarda ishtirok etishiga yetarlicha vaqt bo‘lishi uchun iyun oyi oxiri yoki iyul boshidayoq transfer masalasini hal qilmoqchi.
“Ko‘k-anorranglilar” 33 yoshli hujumchi uchun 30 million yevro va qo‘shimcha bonuslar va’da qilmoqda, deya xabar beradi Diario Sport.
Dastlab Levandovskini sotishga qarshi bo‘lgan “Bavariya” endilikda o‘z pozitsiyasini o‘zgartirishga tayyor. Bunga sabab hujumchi istalgan vaqtda shartnomani buzishi mumkin. FIFA nizomining 17-bandiga ko‘ra, 28 yoshga to‘lgan futbolchilar uzoq muddatli shartnomalarini buzish huquqiga ega bo‘ladi.
Agar Robert shartnomani buzsa, bitimning qolgan yilidagi maoshi — 24 million yevroga yaqin pulni kompensatsiya sifatida to‘lab berishi lozim bo‘ladi. Bu esa kataloniyaliklar taklif qilayotgan puldan kam.
Avvalroq polshalik hujumchi ortiq “Bavariya”da o‘ynashni istamasligi haqida bayonot bergandi. “Barselona” Robert Levandovski uchun rasmiy taklif yuborgani xabar qilingandi.
Levandovski joriy mavsum myunxenliklar safida barcha musobaqalarda 50 ta o‘yinda ishtirok etib, 46 ta golga mualliflik qildi.
Izoh (0)