«Барселона» Роберт Левандовски трансфери устида ишламоқда.
Каталонияликлар польшалик ҳужумчининг мавсумолди машғулотларда иштирок этишига етарлича вақт бўлиши учун июнь ойи охири ёки июль бошидаёқ трансфер масаласини ҳал қилмоқчи.
«Кўк-анорранглилар» 33 ёшли ҳужумчи учун 30 миллион евро ва қўшимча бонуслар ваъда қилмоқда, дея хабар беради Diario Sport.
Дастлаб Левандовскини сотишга қарши бўлган «Бавария» эндиликда ўз позициясини ўзгартиришга тайёр. Бунга сабаб ҳужумчи исталган вақтда шартномани бузиши мумкин. ФИФА низомининг 17-бандига кўра, 28 ёшга тўлган футболчилар узоқ муддатли шартномаларини бузиш ҳуқуқига эга бўлади.
Агар Роберт шартномани бузса, битимнинг қолган йилидаги маоши — 24 миллион еврога яқин пулни компенсация сифатида тўлаб бериши лозим бўлади. Бу эса каталонияликлар таклиф қилаётган пулдан кам.
Аввалроқ польшалик ҳужумчи ортиқ «Бавария»да ўйнашни истамаслиги ҳақида баёнот берганди. «Барселона» Роберт Левандовски учун расмий таклиф юборгани хабар қилинганди.
Левандовски жорий мавсум мюнхенликлар сафида барча мусобақаларда 50 та ўйинда иштирок этиб, 46 та голга муаллифлик қилди.
Изоҳ (0)