Bloomberg: Евроиттифоқ Россияга қарши янги санкцияларни маъқуллади. Улар нефтга қисман эмбарго ва Кабаевага қарши санкцияларни ўз ичига олади

Евроиттифоқ Россияга қарши санкцияларнинг олтинчи пакетини маъқуллади. Бу ҳақда Bloomberg манбаларига таяниб хабар бермоқда, деб ёзади Meduza. Улар Евроиттифоқ расмий журналида эълон қилинганидан кейин кучга киради.

Янги пакет Европа денгиз орқали олиб келинадиган Россия нефтидан воз кечишини кўзда тутади. Евроиттифоқ мамлакатлари уни ярим йил давомида, нефть маҳсулотларини эса саккиз ой давомида сотиб олмаслиги керак бўлади.

Бундан ташқари, ярим йилдан кейин Россия нефтини бошқа мамлакатларга етказиб беришни суғурталашга тақиқ кучга киради, Европа ҳукуматлари режасига кўра, бу ҳам Россия нефть экспортини заифлаштириши керак.

Шунингдек, янги санкциялар «Сбербанк», Москва кредит банки ва «Росселхозбанк»ни SWIFT халқаро тўлов тизимидан узишни ўз ичига олади. Аввалроқ ВТБ ва «Откритие» каби бир нечта йирик банклар бу тизимдан узилган эди.

Bloomberg маълумотларига кўра, янги пакет доирасида собиқ гимнастикачи Алина Кабаевага қарши санкциялар киритилди, унинг Россия президенти Владимир Путин билан «яқин алоқаси» бор деб ҳисоблашади. Шу билан бирга, Венгриянинг талаби билан санкция рўйхатидан патриарх Кирилл истисно қилинди.

Евроиттифоқ Россияга қарши санкцияларнинг олтинчи пакетини кўп ҳафталардан буён келиша олмаётган эди. Асосий тўсиқ Россиядан қувур орқали нефть қабул қилаётган Венгриянинг тўлиқ нефть эмбаргоси киритилишига қаршилиги бўлаётган эди.