Италия ҳукумати раҳбари Марио Драги Европа Иттифоқи Кенгашининг июнь ойида бўлиб ўтадиган йиғилишида Украинага ЕИга номзод мақоми берилмаслигини маълум қилди, деб ёзмоқда АНСА.
«Европа Иттифоқининг деярли барча йирик давлатлари Украинага ЕИга номзод мақомини беришга қарши», — деди Драги Европа Иттифоқи саммитидан кейин уюштирилган матбуот анжуманида.
У Италиянинг ушбу масаладаги позицияси бошқача эканини таъкидлади. «Биз номзод мақомини сўрашимиз мумкин, аммо бир қатор мамлакатларнинг қаршилиги туфайли ҳозир бу кутилмаяпти», — деди у.
Драгининг таъкидлашича, шу билан бирга Украинага Еврокомиссия томонидан ишлаб чиқилиши керак бўлган «тезлаштирилган тартиб бўйича» ЕИга аъзоликка тайёрланиш имконияти берилиши мумкин.
31 май куни Европа Иттифоқи кенгаши Украинадаги вазият бўйича кенг қамровли ҳужжатни эълон қилди. Хусусан, унда шундай дейилган: «Европа Иттифоқи Кенгаши Комиссиянинг Украина, шунингдек, Молдова Республикаси ва Грузиянинг Европа Иттифоқига аъзо бўлиш ҳақидаги аризаси бўйича хулосаларини тайёрлашни эътиборга олади. Июндаги йиғилишда бу масалага қайтади».
Украина Россия босқини бошланганидан бир неча кун ўтиб ЕИга қўшилиш учун ариза берди. Европа комиссияси ва ЕИга аъзо қатор давлатлар, жумладан, Польша вакиллари Украинани унинг аризаси имкон қадар тезроқ кўриб чиқилишига ишонтирди.
Ўз навбатида, Франция президенти Эммануэль Макрон Украинанинг ЕИга қўшилиш жараёни кўп йиллар давом этишини айтиб, Украинани ҳам ўз ичига оладиган «Европа сиёсий ҳамжамиятини» яратиш ғоясини илгари сурди. Украина расмийлари бу фикрни қўллаб-қувватламади.
Изоҳ (0)