Yoqimli ifor inson ruhiyatiga ta’sir etibgina qolmay, unga nisbatan atrofdagilarda yaxshi taassurot uyg‘otadi. Shuning uchun ham atir tanlashga alohida e’tibor berish lozim. Biroq ko‘pchilik opa-singillarimiz atir tanlashda yetarlicha ma’lumotlarga ega emas.
Aromastilist Dilshod Hojiqurbonov “Daryo” bilan suhbatda yaxshi atir tanlash borasida o‘z tavsiyalari bilan bo‘lishdi.
Yomon kayfiyatda atir do‘koniga kelmang
Birinchi o‘rinda, atir do‘koniga yaxshi kayfiyatda kelsin. Abzoyi buzuq odamga hech narsa yoqmaydi. Bu o‘z tajribamdan ko‘p o‘tgan.Ko‘pchilik ayollarimiz asabiylashganda odatda savdo markazlariga boradi. O‘ziga yoqqan nimadir xarid qilib, kayfiyatini ko‘tarmoqchi bo‘ladi. Kiyim-kechak do‘konlariga borishlari mumkin, lekin atir do‘konlariga kelishlarini tavsiya qilmayman. Yomon kayfiyatdagi ayol umuman odam atir tanlolmaydi.
Atir sotib olayotganda hech kim bilan maslahatlashmang
Kiyim xarid qilayotganda siz kimningdir fikriga tayanib, sotib olishingiz mumkin. Ammo atirda bu usul ish bermaydi. Parfyumni faqat va faqat o‘z didingizga qarab tanlaganingiz ma’qul.Dugonangiz tugul, hatto onangizga yoqqan ifor sizga xush kelmasligi mumkin va bu tabiiy.
Sizga tavsiya qilinayotgan atir eng qimmat, noyob bo‘lsa ham ichki ovozingizga quloq solib tanlang. Unutmang, dunyodagi eng zo‘r atir – bu sizga yoqqan atir!
Bitta istisnoli holat: agar oila qurgan bo‘lsangiz atir tanlayotganda, albatta, turmush o‘rtog‘ingizni fikrni inobatga oling, u bilan maslahatlashing. Umuman olganda men ayol eriga erkak esa o‘z ayoliga atir tanlab bergani ma’qul deb o‘ylayman.
Hech qachon atirlarning “lyuks-kopiya”sini sotib olmang!
To‘g‘ri, ko‘rinish jihatdan haqiqiy atir bilan bir xil bo‘ladi. Sepilganda boshida o‘sha iforni berishi mumkin. Lekin 20-30 daqiqadan so‘ng, hidni farqlay boshlaysiz. Buni o‘sha atirning haqiqiysini ishlatib ko‘rganlar, yaxshi biladi.Hozir O‘zbekistondagi ko‘pgina atir do‘konlarida quyib berish xizmati yo‘lga qo‘yilgan. Agar yoqtirgan atiringiz juda qimmat bo‘lsa, 10 ml quydirib sotib olsangiz bo‘ladi.
Katta hajmli atir sotib olmang
Chunki odam o‘zgaruvchan mavjudot. Bir xillik tezda medasiga tegadi.Masalan, do‘kondan 50-100 millilitr atirlarni olib ketishadi. Atirni tugatguncha hid joniga tegadi.
Qimmat atirni na birovga ham berib yuborgisi keladi, na o‘zi sepgisi. Shunday qilib, palon pulga olingan atirlar pardoz stolining bir chetida qolib ketaveradi.
Shuning uchun o‘zingizga yoqqan atirdan quydirib olib ishlatishni tavsiya qilaman. Misol uchun bir millionli atirni 140-150 ming so‘mga 10 ml quydirib olib, 1-1,5 oy davomida ishlatib yurish mumkin.
O‘ziga mos atirni topa olmayotganlarga katta hajmda atir sotib olmaslikni tavsiya qilaman. Chunki inson o‘z iforini birdaniga topishi qiyin. “Bo‘ldi, topdim” degan taqdirda ham do‘konda ma’qul kelgan ifor uyiga borganida yoqmay qolishi mumkin. Chunki atir tuslanish xususiyatiga ega. Atir sepilganidan to‘rt soat o‘tib, haqiqiy ifori bilinadi. Shuning uchun mijoz o‘ziga yoqqan turli atirlardan 10 millilitrdan quydirib olib, ishlatib, o‘z iforini topishi mumkin.
Izoh (0)