Ёқимли ифор инсон руҳиятига таъсир этибгина қолмай, унга нисбатан атрофдагиларда яхши таассурот уйғотади. Шунинг учун ҳам атир танлашга алоҳида эътибор бериш лозим. Бироқ кўпчилик опа-сингилларимиз атир танлашда етарлича маълумотларга эга эмас.
Аромастилист Дилшод Ҳожиқурбонов «Дарё» билан суҳбатда яхши атир танлаш борасида ўз тавсиялари билан бўлишди.
Ёмон кайфиятда атир дўконига келманг
Биринчи ўринда, атир дўконига яхши кайфиятда келсин. Абзойи бузуқ одамга ҳеч нарса ёқмайди. Бу ўз тажрибамдан кўп ўтган.Кўпчилик аёлларимиз асабийлашганда одатда савдо марказларига боради. Ўзига ёққан нимадир харид қилиб, кайфиятини кўтармоқчи бўлади. Кийим-кечак дўконларига боришлари мумкин, лекин атир дўконларига келишларини тавсия қилмайман. Ёмон кайфиятдаги аёл умуман одам атир танлолмайди.
Атир сотиб олаётганда ҳеч ким билан маслаҳатлашманг
Кийим харид қилаётганда сиз кимнингдир фикрига таяниб, сотиб олишингиз мумкин. Аммо атирда бу усул иш бермайди. Парфюмни фақат ва фақат ўз дидингизга қараб танлаганингиз маъқул.Дугонангиз тугул, ҳатто онангизга ёққан ифор сизга хуш келмаслиги мумкин ва бу табиий.
Сизга тавсия қилинаётган атир энг қиммат, ноёб бўлса ҳам ички овозингизга қулоқ солиб танланг. Унутманг, дунёдаги энг зўр атир – бу сизга ёққан атир!
Битта истисноли ҳолат: агар оила қурган бўлсангиз атир танлаётганда, албатта, турмуш ўртоғингизни фикрни инобатга олинг, у билан маслаҳатлашинг. Умуман олганда мен аёл эрига эркак эса ўз аёлига атир танлаб бергани маъқул деб ўйлайман.
Ҳеч қачон атирларнинг «люкс-копия»сини сотиб олманг!
Тўғри, кўриниш жиҳатдан ҳақиқий атир билан бир хил бўлади. Сепилганда бошида ўша ифорни бериши мумкин. Лекин 20-30 дақиқадан сўнг, ҳидни фарқлай бошлайсиз. Буни ўша атирнинг ҳақиқийсини ишлатиб кўрганлар, яхши билади.Ҳозир Ўзбекистондаги кўпгина атир дўконларида қуйиб бериш хизмати йўлга қўйилган. Агар ёқтирган атирингиз жуда қиммат бўлса, 10 мл қуйдириб сотиб олсангиз бўлади.
Катта ҳажмли атир сотиб олманг
Чунки одам ўзгарувчан мавжудот. Бир хиллик тезда медасига тегади.Масалан, дўкондан 50-100 миллилитр атирларни олиб кетишади. Атирни тугатгунча ҳид жонига тегади.
Қиммат атирни на бировга ҳам бериб юборгиси келади, на ўзи сепгиси. Шундай қилиб, палон пулга олинган атирлар пардоз столининг бир четида қолиб кетаверади.
Шунинг учун ўзингизга ёққан атирдан қуйдириб олиб ишлатишни тавсия қиламан. Мисол учун бир миллионли атирни 140-150 минг сўмга 10 мл қуйдириб олиб, 1-1,5 ой давомида ишлатиб юриш мумкин.
Ўзига мос атирни топа олмаётганларга катта ҳажмда атир сотиб олмасликни тавсия қиламан. Чунки инсон ўз ифорини бирданига топиши қийин. «Бўлди, топдим» деган тақдирда ҳам дўконда маъқул келган ифор уйига борганида ёқмай қолиши мумкин. Чунки атир тусланиш хусусиятига эга. Атир сепилганидан тўрт соат ўтиб, ҳақиқий ифори билинади. Шунинг учун мижоз ўзига ёққан турли атирлардан 10 миллилитрдан қуйдириб олиб, ишлатиб, ўз ифорини топиши мумкин.
Изоҳ (0)