Aprel boshidan buyon dunyoning 33 ta mamlakatidagi 650 nafar bolada kelib chiqishi noma’lum bo‘lgan o‘tkir gepatit aniqlangan. Bu haqda Jahon sog‘liqni saqlash tashkiloti (JSST) ma’lum qildi, deb yozadi “RBK”.
Ushbu holatlarning ko‘pchiligi Yevropa mamlakatlari, ayniqsa, Buyuk Britaniya hissasiga to‘g‘ri kelmoqda (222 ta holat). JSST, shuningdek, AQSH (216), Tinch okeani g‘arbiy qismi, janubi-sharqiy Osiyo va sharqi O‘rta Yer dengizi mamlakatlaridan kelib tushgan ma’lumotlarning bir qismini tekshirmoqda.
Kasallanish holatlari qayd etilgan mamlakatlar orasida Argentina, Avstraliya, Belgiya, Bolgariya, Kanada, Kipr, Daniya, Fransiya, Gretsiya, Indoneziya, Irlandiya, Isroil, Italiya, Yaponiya, Maldiv, Meksika, Moldova, Niderlandiya, Norvegiya, Falastin, Panama, Polsha, Portugaliya, Janubiy Koreya, Ruminiya, Serbiya, Singapur, Slovakiya, Sloveniya, Ispaniya va Shvetsiya ham bor. Yevroittifoq mamlakatlarida kasallanish holatlarining 75 foizi besh yoshdan kichik bolalar ulushiga to‘g‘ri kelgan.
JSST ta’kidlashicha, bolalarda o‘tkir jigar yetishmovchiligi rivojlanadi. Dunyo bo‘yicha barcha kasallangan bolalarning 6 foiziga jigar transplantatsiyasi talab qilingan, 9 kishi vafot etgan.
Shu bilan birga, mutaxassislar kasallanish manbasini va qo‘zg‘atuvchining yuqish usulini aniqlaganicha yo‘q. Ular bemorlarning bir qismida adenovirus va koronavirusni qayd etgan. Ammo gepatit ushbu viruslardan keyin asorat sifatida yuzaga kelishi haqida ma’lumotlar hozircha yo‘q. JSST bu gipotezani o‘rganishda davom etmoqda.
Noma’lum gepatit bilan kasallanish bo‘yicha ilk holatlar aprel boshida aniqlangan edi. 5-aprelga kelib, JSST markaziy Shotlandiyada o‘n nafar bola, 8-aprelga kelib esa butun Buyuk Britaniyada 74 ta holat haqida ma’lum qilgan.
23-aprelda JSST bir oylikdan 16 yoshgacha bo‘lgan bolalar orasidagi 169 ta holat haqida xabar berdi. Olimlar hech bir holatda gepatitning bizga ma’lum bo‘lgan A, B, C, D va E viruslarini aniqlamagan.
Izoh (0)