Украинанинг собиқ президенти Пётр Порошенко 30 май куни Украинадан Польшага жўнаб кетди. Бунгача, 28 май куни у икки марта давлат чегарасини кесиб ўтишга уринган, бироқ сиёсатчини мамлакатдан ташқарига чиқаришмаган эди.
30 май куни Порошенко Facebook’да Украинанинг амалдаги президенти Владимир Зеленскийга очиқ хат эълон қилди. Собиқ президент, хусусан, Роттердамга Европа халқ партияси қурултойи ва саммитига расмий таклиф билан кетаётганини қайд этди.
Порошенконинг сўзларига кўра, сафардан қуйидаги мақсадлар кўзланган — июнь ойида Украинага Европа Иттифоқи аъзолигига номзод мақомини бериш, Украинани Россияга қарши урушда қўллаб-қувватлаш ва янги санкцияларга эришиш, шунингдек, молиявий ёрдам, жумладан, урушдан кейин мамлакатни қайта тиклаш. Украинанинг собиқ президенти уруш даврида донолик ва ички бирликни намоён этиш ниҳоятда муҳим эканини таъкидлаган.
Мурожаат эълон қилинганидан кўп ўтмай, Украина ОАВлари, жумладан, «Громадске» ва «Украинская правда» нашрлари Порошенко чегарани кесиб ўтгани ҳақида хабар берди.
Порошенко НАТО Парламент Ассамблеяси йиғилишига бориш учун Украинани тарк этишга дастлаб икки марта уринди. Унинг кетишга рухсати бор эди, бироқ украиналик чегарачилар биринчи сафар QR кодни ўқий олмади, кейин эса Украина собиқ президентида зарур ҳужжатлар етарли эмаслигини айтишди.
Украина ҳуқуқ-тартибот идоралари Порошенкони 2014—2015 йилларда Донецк ва Луганск халқ республикаларидан кўмир келтириш бўйича иш доирасида давлатга хиёнат, террорчи ташкилотларга ёрдам бериш ва терроризмни молиялаштиришда айбламоқда. Порошенко паспортини топшириш шарти билан Киев суди сиёсатчини шахсий мажбуриятлари юзасидан озод қилиш тўғрисида қарорни қабул қилган.
Изоҳ (0)