Global iqtisodiy o‘sish bo‘yicha prognozlar yomonlashishda davom etmoqda

2022-yilda global iqtisodiy o‘sish bo‘yicha prognozlar yomonlashishda davom etmoqda. Bu haqda Xalqaro moliya instituti (IIF) xabar berdi.

Global yalpi ichki mahsulot 2021-yilda 5,8 foizga o‘sib, 2020-yilda 3,4 foizga pasayganidan keyin joriy yilda atigi 2,3 foizga o‘sishiga ishonilmoqda. Rivojlangan mamlakatlarda YIM o‘sishi 2,1 foiz, rivojlanayotgan mamlakatlarda — 2,5 foiz bo‘ladi.

Xalqaro Valyuta Jamg‘armasi aprel oyida joriy va kelasi yil global iqtisodiy o‘sishini 3,6 foiz deb prognoz qildi. Yevropa uchun prognoz jiddiy qayta ko‘rib chiqildi — 3 foizdan 1 foizgacha tushdi.

Hisob-kitoblarga ko‘ra, yilning ikkinchi yarmida retsessiya kutilmoqda – bunday prognoz Yevropa Komissiyasi hisob-kitoblaridan sezilarli darajada salbiyroqdir.

Rossiya uchun prognoz ham boshqa ko‘plab taxminlarga qaraganda salbiyroq: 15 foizga pasayish kutilmoqda.

Ukraina yalpi ichki mahsuloti 35 foizga qisqaradi, bu esa mintaqaning boshqa mamlakatlariga ta’sir qiladi.

Yangi prognoz anti-COVID cheklovlarining Xitoy iqtisodiyotiga yanada aniq ta’sirini hisobga olgan. IIF ikkinchi chorakda Xitoy yalpi ichki mahsulotining yillik ko‘rsatkichlarda 2,4 foizga pasayishini va yil oxirida 3,5 foizga o‘sishini kutmoqda.

Kecha Moody’s reyting agentligi ham makroprognozini yangiladi - ular bu yil rivojlangan mamlakatlar iqtisodiyoti 2,6 foizga, rivojlanayotgan mamlakatlar 3,8 foizga o‘sishini kutmoqda.

Oldingi prognoz mos ravishda 3,2 va 4,2 foiz bo‘lgan. Hozircha agentlik G20 davlatlarining hech birida retsessiya kutmayapti, biroq agressiv monetar qat’iylashtirish bunday ssenariy xavfini oshirishi mumkinligini ta’kidlamoqda.

Avvalroq butunjahon iqtisodiyoti ikkinchi jahon urushidan beri eng katta sinov oldida turgani haqida xabar berilgan edi.