AQSH prezidenti Jo Bayden ma’muriyati Ukrainaga baravar o‘t ochish reaktiv tizimlarini yetkazib berish imkoniyatini ko‘rib chiqmoqda. Bu haqda CNN o‘z manbalariga tayanib xabar berdi, deb yozadi “RBK”. Ular harbiy yordamning yangi paketiga kiritilishi mumkin, u haqda esa AQSH kelasi hafta e’lon qiladi.
CNN yozishicha, o‘tgan hafta Pentagon vakillari Lockheed Martin bosh direktori bilan uchrashib, baravar o‘t ochish reaktiv tizimlarini yetkazib berish va ishlab chiqarishni oshirishni muhokama qilgan.
AQSHda ishlab chiqariladigan tizimlar yuzlab kilometrlarga raketa uchirishga qodir, bu hozir Ukrainada mavjud bo‘lgan tizimlar qodir bo‘lgan masofadan ancha katta. Kiyevdagilar fikricha, ularning Ukraina tomoniga berilishi jangovar harakatlar borishini o‘zgartira oladi.
Ukraina hukumati, xususan, prezident Vladimir Zelenskiy mamlakatning M142 HIMARS va M270 MLRS baravar o‘t ochish tizimlariga ehtiyoji borligi haqida aytgan edi. Ammo Bayden ma’muriyati Milliy xavfsizlik kengashida aytilgan, Ukraina qurol-yarog‘dan Rossiya hududini o‘qqa tutishda foydalanishi mumkinligi haqidagi xavotirlar fonida bir necha haftalar davomida buni rad etib kelayotgandi.
So‘nggi oylarda AQSH Ukrainani ittifoqchilarining zaxiralaridagi sovet davridan qolgan eski qurollardan foydalanadigan bir nechta baravar o‘t ochish tizimlari bilan ta’minladi. Ammo Kiyev Rossiyaning Donbassda olg‘a siljishini to‘xtatish uchun aniqroq va kuchliroq Amerika tizimlarini ishga solishga intilmoqda.
Urush boshida Vladimir Zelenskiy G‘arb davlatlarini Ukrainani yetarlicha qo‘llab-quvvatlamagani, jumladan, yetarlicha qurol-yarog‘ yetkazib bermayotgani uchun tez-tez qoralardi. Aprel oyi oxirida u mamlakat nihoyat so‘ragan qurol turlarini ola boshlaganini e’lon qildi.
May oyi boshida AQSH prezidenti Jo Bayden Ukrainaga harbiy texnika yetkazishni tezlashtirish imkonini beruvchi lend-liz dasturi to‘g‘risidagi qonunni imzoladi. Ammo bir necha kundan so‘ng Ukrainaga 40 milliard dollar qo‘shimcha yordam ko‘rsatish to‘g‘risidagi qonun loyihasi Senatdagi bir respublikachi senator tomonidan bloklandi.
Izoh (0)