Shavkat Mirziyoyev 24-may kuni Rossiya prezidenti Vladimir Putin bilan telefon orqali muloqot qildi. Bu haqda Prezident matbuot xizmati xabar qildi.
Qayd etilishicha, muloqotda O‘zbekiston—Rossiya strategik sheriklik va ittifoqchilik munosabatlarini rivojlantirish, ikki mamlakat o‘rtasidagi hamkorlikni kengaytirishning asosiy masalalari ko‘rib chiqilgan. O‘tgan yil noyabr oyida Moskva shahrida o‘tgan oliy darajadagi uchrashuvda erishilgan kelishuvlarni amalga oshirishga e’tibor qaratilgan.
Joriy yil boshidan faol muloqotlar va o‘zaro tashriflar sur’ati oshgani qayd etilgan. Mart oyi oxirida birinchi Toshkent xalqaro investitsiya forumi hamda aprel oyida Toshkentda yangi mintaqaviy formatda tashkil etilgan “Innoprom” xalqaro sanoat ko‘rgazmasi doirasida ikki tomonlama tadbirlar muvaffaqiyatli o‘tkazilgan.
O‘zbekiston va Rossiya yetakchilari ishbilarmon doiralar o‘rtasidagi kooperatsiya aloqalarini chuqurlashtirish va hududlararo aloqalarning katta salohiyatidan samarali foydalanish muhimligini qayd etgan. Mintaqaviy kun tartibi va xalqaro siyosat masalalari yuzasidan ham fikr almashilgan.
Bundan avval Shavkat Mirziyoyev va Vladimir Putin ikki davlat diplomatik munosabatlari o‘rnatilganining 30 yilligi munosabati bilan bir-birini tabriklagani xabar qilingandi. Shuningdek, Rossiya prezidenti Shavkat Mirziyoyev va O‘zbekiston xalqini Navro‘z bayrami bilan tabriklagani, O‘zbekiston rahbari Shavkat Mirziyoyev Rossiya iqtisodiy rivojlanish vaziri bilan uchrashgani haqida xabar berilgan.
Mavzuga doir:
- Rossiya va Ukraina muammolarini tinchlik yo‘li bilan hal qilishi tarafdorimiz — Senatning Mudofaa va xavfsizlik masalalari qo‘mitasi
- Shavkat Mirziyoyev Qosim-Jo‘mart To‘qayev bilan xalqaro kun tartibidagi masalalar bo‘yicha fikr almashdi
- “O‘zbekiston bu masala bo‘yicha vazmin, neytral pozitsiyada” – Sherzod Asadov Ukraina voqealari haqida
Izoh (0)