Шавкат Мирзиёев Путин билан минтақавий ва халқаро сиёсат масалалари юзасидан фикр алмашди

Шавкат Мирзиёев 24 май куни Россия президенти Владимир Путин билан телефон орқали мулоқот қилди. Бу ҳақда Президент матбуот хизмати хабар қилди.

Қайд этилишича, мулоқотда Ўзбекистон—Россия стратегик шериклик ва иттифоқчилик муносабатларини ривожлантириш, икки мамлакат ўртасидаги ҳамкорликни кенгайтиришнинг асосий масалалари кўриб чиқилган. Ўтган йил ноябрь ойида Москва шаҳрида ўтган олий даражадаги учрашувда эришилган келишувларни амалга оширишга эътибор қаратилган.

Жорий йил бошидан фаол мулоқотлар ва ўзаро ташрифлар суръати ошгани қайд этилган. Март ойи охирида биринчи Тошкент халқаро инвестиция форуми ҳамда апрель ойида Тошкентда янги минтақавий форматда ташкил этилган «Иннопром» халқаро саноат кўргазмаси доирасида икки томонлама тадбирлар муваффақиятли ўтказилган.

Ўзбекистон ва Россия етакчилари ишбилармон доиралар ўртасидаги кооперация алоқаларини чуқурлаштириш ва ҳудудлараро алоқаларнинг катта салоҳиятидан самарали фойдаланиш муҳимлигини қайд этган. Минтақавий кун тартиби ва халқаро сиёсат масалалари юзасидан ҳам фикр алмашилган.

Бундан аввал Шавкат Мирзиёев ва Владимир Путин икки давлат дипломатик муносабатлари ўрнатилганининг 30 йиллиги муносабати билан бир-бирини табриклагани хабар қилинганди. Шунингдек, Россия президенти Шавкат Мирзиёев ва Ўзбекистон халқини Наврўз байрами билан табриклагани, Ўзбекистон раҳбари Шавкат Мирзиёев Россия иқтисодий ривожланиш вазири билан учрашгани ҳақида хабар берилган.