Euronews kanalida bir hafta davomida O‘zbekiston haqida bir daqiqalik sujetlar namoyish etiladi

Shunday roliklardan dastlabkisi Kann kinofestivalida O‘zbekiston Milliy pavilyonining faoliyatiga bag‘ishlandi.

Videoyozuvlar Destination Uzbekistan kampaniyasi doirasida namoyish etiladi. Ingliz va rus tillaridagi yangiliklar dasturida mamlakatimiz hayotidagi ahamiyatga molik voqealar haqida so‘z boradi. Aytib o‘tish joizki, Kanndagi Pavilyon allaqachon xalqaro rejissorlar va prodyuserlar e’tiborini tortgan. Ular bilan kino va televideniye sohalarida qo‘shma loyihalarni amalga oshirish bo‘yicha hamkorlikdagi kelishuvlarga erishildi, memorandumlar imzolandi va ish rejasi belgilandi.

Kampaniyaning maqsadi – O‘zbekistonning yangi imijiga e’tiborni jalb qilish, turizmni rivojlantirish va obro‘sini oshirish, O‘zbekistonning xorijda zamonaviy, intellektual va raqobatbardosh mamlakat sifatida namoyon bo‘lishida ko‘maklashishdan iborat.

Kompaniya o‘z ishini iyun oyida davom ettiradi va Yevropada yashovchi o‘zbeklar haqida “O‘zbekistonlik” filmining ikkinchi qismini suratga olish jarayonlarini yoritadi. Shuningdek, 2022-yil iyun oyi oxirida Turizm va madaniy meros vazirligi, Yoshlar ishlari agentligi va Berlindagi O‘zbekiston elchixonasi ko‘magida Berlinda bo‘lib o‘tadigan New Uzbekistan xalqaro forumi to‘g‘risida hikoya qiladi.