“Roma” “Yuventus”ning yetakchisini o‘z safiga qo‘shib olmoqchi. Totti o‘zining 10-raqamini unga berishga tayyor

“Roma”ning sobiq hujumchisi Franchesko Totti “Yuventus”ni tark etayotgan hujumchi Paulo Dibalani Rim klubiga o‘tishga ko‘ndirmoqchi.

Argentinalik futbolchi yozda erkin agentga aylanadi. Uning “Yuventus” bilan shartnomasi o‘z nihoyasiga yetmoqda.

Uni Rimga olib kelishga ko‘ndira olamanmi-yo‘qmi, ko‘ramiz. Tez orada ko‘rishamiz, shunda uni “Roma”ga olib kelishga urinaman.

Hozircha suhbatlashmadik. Hali vaqt bor, bu haqida keyinroq gaplashamiz.

Men mamnunlik bilan unga 10-raqamimni berishga tayyorman. Albatta, uning o‘zi buni xohlasa. Tanlov uning qo‘lida.

Franchesko Totti, “Roma”ning sobiq hujumchisi

Avvalroq Dibala bir qarorga kelgani, yozda “Yuventus”ni tark etishi xabar qilingandi.

Ayni damda futbolchiga asosiy da’vogar “Inter” hisoblanadi. Shuningdek, unga “Atletiko” ham qiziqish bildirmoqda. Avvalroq, “Liverpul” va “Manchester Siti”ning Pauloni tekinga qo‘lga kiritmoqchi ekanligi to‘g‘risida xabarlar yangragandi.

28 yoshli futbolchi 2021/22-yilgi mavsum “Yuventus” safida A Seriyada 29 ta o‘yin o‘tkazib, 10 ta gol va 5 ta golli uzatmaga mualliflik qildi.