«Рома» «Ювентус»нинг етакчисини ўз сафига қўшиб олмоқчи. Тотти ўзининг 10-рақамини унга беришга тайёр

«Рома»нинг собиқ ҳужумчиси Франческо Тотти «Ювентус»ни тарк этаётган ҳужумчи Пауло Дибалани Рим клубига ўтишга кўндирмоқчи.

Аргентиналик футболчи ёзда эркин агентга айланади. Унинг «Ювентус» билан шартномаси ўз ниҳоясига етмоқда.

Уни Римга олиб келишга кўндира оламанми-йўқми, кўрамиз. Тез орада кўришамиз, шунда уни «Рома»га олиб келишга уринаман.

Ҳозирча суҳбатлашмадик. Ҳали вақт бор, бу ҳақида кейинроқ гаплашамиз.

Мен мамнунлик билан унга 10-рақамимни беришга тайёрман. Албатта, унинг ўзи буни хоҳласа. Танлов унинг қўлида.

Франческо Тотти, «Рома»нинг собиқ ҳужумчиси

Аввалроқ Дибала бир қарорга келгани, ёзда «Ювентус»ни тарк этиши хабар қилинганди.

Айни дамда футболчига асосий даъвогар «Интер» ҳисобланади. Шунингдек, унга «Атлетико» ҳам қизиқиш билдирмоқда. Аввалроқ, «Ливерпуль» ва «Манчестер Сити»нинг Паулони текинга қўлга киритмоқчи эканлиги тўғрисида хабарлар янграганди.

28 ёшли футболчи 2021/22 йилги мавсум «Ювентус» сафида А Серияда 29 та ўйин ўтказиб, 10 та гол ва 5 та голли узатмага муаллифлик қилди.