Hozir kunda O‘zbekiston qonunlari to‘g‘ridan to‘g‘ri amal qilmaydi. Bu haqda Senat raisining birinchi o‘rinbosari Sodiq Safoyev 24-may kuni Taraqqiyot strategiyasi markazi tomonidan o‘tkazilgan tadbirdan so‘ng “Daryo” muxbiriga bergan intervyusida aytib o‘tdi.
Sodiq Safoyevning ta’kidlashicha, to‘g‘ridan to‘g‘ri amal qilishi uchun qonunlarni ilmiy asosda ishlab chiqish zarur.
“Afsuski, hozirgi kunda qonunlarimiz to‘g‘ridan to‘g‘ri amal qilmaydi. Bu eskidan qolgan udumimiz. Ammo bu faqatgina bizning muammo emas. Kamdan kam mamlakatlarda qonunlarga to‘g‘ridan to‘g‘ri amal qilish metodologiyasi rivojlangan. Bu jarayon juda katta ilm-fanni talab qiladi. Masalan, men Germaniyadagi elchixonamizda ishlaganman. Bilamanki, u yerda qonunlar bevosita amal qiladi va ularning har bittasi 600 varoqli bo‘ladi. Bizning qonunlarga o‘xshab 5-6 ta varoq emas. Qonun qabul qilish uchun ekspertlar, olimlar va butun tizim ishlashi kerak. Hozir bizda har bitta qonun qabul qilingandan keyin, uni ishga yurituvchi qonunosti hujjatlarini ham qabul qilishimiz kerak. Bu ham yomon emas. Ammo qonunning ta’sirini biroz tushiradi. Shuning uchun oldimizda turgan masala qonunchilik metodologiyasini, avvalo, fan orqali o‘rganib chiqishimiz kerak. Bu borada biz Germaniya olimlari bilan ish olib boryapmiz. Ishonamanki, kelajakda, albatta, shunga o‘tishimiz kerak. Lekin bu qachon bo‘lishini ayta olmayman”, — dedi Senat rasmiysi.
Avvalroq Sodiq Safoyev, kun tartibidagi eng muhim masala — davlat hokimiyatining aholi oldidagi javobgarligini ta’minlash ekani haqida gapirgandi.
Izoh (0)