Ҳозир кунда Ўзбекистон қонунлари тўғридан-тўғри амал қилмайди. Бу ҳақда Сенат раисининг биринчи ўринбосари Содиқ Сафоев 24 май куни Тараққиёт стратегияси маркази томонидан ўтказилган тадбирдан сўнг «Дарё» мухбирига берган интервьюсида айтиб ўтди.
Содиқ Сафоевнинг таъкидлашича, тўғридан-тўғри амал қилиши учун қонунларни илмий асосда ишлаб чиқиш зарур.
«Афсуски, ҳозирги кунда қонунларимиз тўғридан-тўғри амал қилмайди. Бу эскидан қолган удумимиз. Аммо бу фақатгина бизнинг муаммо эмас. Камдан кам мамлакатларда қонунларга тўғридан-тўғри амал қилиш методологияси ривожланган. Бу жараён жуда катта илм-фанни талаб қилади. Масалан, мен Германиядаги элчихонамизда ишлаганман. Биламанки, у ерда қонунлар бевосита амал қилади ва уларнинг ҳар биттаси 600 вароқли бўлади. Бизнинг қонунларга ўхшаб 5-6 та вароқ эмас. Қонун қабул қилиш учун экспертлар, олимлар ва бутун тизим ишлаши керак. Ҳозир бизда ҳар битта қонун қабул қилингандан кейин, уни ишга юритувчи қонуности ҳужжатларини ҳам қабул қилишимиз керак. Бу ҳам ёмон эмас. Аммо қонуннинг таъсирини бироз туширади. Шунинг учун олдимизда турган масала қонунчилик методологиясини, аввало, фан орқали ўрганиб чиқишимиз керак. Бу борада биз Германия олимлари билан иш олиб боряпмиз. Ишонаманки, келажакда, албатта, шунга ўтишимиз керак. Лекин бу қачон бўлишини айта олмайман», — деди Сенат расмийси.
Аввалроқ Содиқ Сафоев, кун тартибидаги энг муҳим масала — давлат ҳокимиятининг аҳоли олдидаги жавобгарлигини таъминлаш экани ҳақида гапирганди.
Изоҳ (0)