Qarshi aeroportining aerovokzal kompleksida rekonstruksiya ishlari boshlandi, deb xabar beradi Transport vazirligi matbuot xizmati.
Ma’lum qilinishicha, dastlabki bosqichda tashrif buyuruvchilar uchun mo‘ljallangan zal kengaytirilib, aerovokzalning yo‘lovchilar o‘tkazuvchanlik qobiliyatini soatiga 200 yo‘lovchidan 400 nafar yo‘lovchiga oshirish rejalashtirilgan.
Shuningdek, aerovokzalning ikkinchi qavati jo‘nab ketuvchi yo‘lovchilar uchun mo‘ljallab qayta rekonstruksiya qilinadi. Buning natijasida kompleksdagi yo‘lovchilarni ro‘yxatdan o‘tkazish ustunlari soni hozirgi 3 dan 10 taga oshiriladi.
Shu bilan birga zamonaviy bagaj taqsimlovchi lentalar, elektron tarozilar va yo‘lovchilar uchun qulayliklar yaratishga mo‘ljallangan boshqa moslamalar o‘rnatiladi.
Eslatib o‘tamiz, 18-mart kuni aeroport majmuasining tantanali ochilish marosimi bo‘lib o‘tgan edi. Yangi terminal qurish loyihasi Air Marakanda va davlat hamkori Uzbekistan Airports o‘rtasida O‘zbekiston aviatsiya tarixidagi birinchi davlat-xususiy sheriklik kelishuvi doirasida amalga oshirilgan.
Yangi terminal rejalashtirilgan reyslar sonini haftasiga 40 tadan 120 tagacha oshirish imkonini bergan, perronning modernizatsiya qilinishi esa samolyotlar to‘xtash joylari sonini 24 taga yetkazgan. Uzbekistan Airports boshqaruv kengashi raisi Ra’no Jo‘rayevaga ko‘ra, mazkur loyiha umumiy hisobda 150 million dollarga tushgan.
Izoh (0)